WWF kërkon diskutim publik për ndërtimet në shtratin e Danubit

Me një letër të hapur drejtuar ministrave të energjetikës, të transportit dhe komunikimeve, si dhe të mjedisit dhe ujërave, organizata për mbrojtjen e natyrës WWF Bullgaria kërkon prezantim dhe diskutim publik të varianteve teknike dhe të zgjidhjes së zgjedhur për një vepër hidroteknike pranë centralit bërthamor „Kozloduy“. Qëllimi i ndërtimit të saj është ngritja e nivelit të ujit dhe sigurimi i funksionimit të sistemeve të ftohjes së centralit bërthamor. Para disa ditësh, ministrja e energjetikës, Iva Petrova, njoftoi se do të ndërtohet një digë në lumin Danub pranë zonës së centralit bërthamor „Kozloduy“.

Nuk dihet nëse objekti do të jetë i përkohshëm apo i përhershëm, cilat do të jenë parametrat dhe konstruksioni i tij, si dhe çfarë pjese të seksionit të lumit do të zërë, theksojnë nga WWF Bullgaria. Sipas tyre, nuk ka një analizë të pasojave për transportin e shkaktuar nga sedimentet, për brigjet, ishujt dhe habitatet lumore.

Sipas të dhënave të organizatës, probleme të ngjashme me ujin ftohës të centraleve bërthamore „Paks“ në Hungari dhe „Cernavodă“ në Rumani kanë çuar në ndërhyrje në shkallë të gjerë në shtretërit e lumenjve dhe në nevojën për masa shtesë të mëvonshme.

Përpiloi: Joan Kolev

Përgatiti në shqip: Sindi Nikollofski