Festivali “Panairi i Kukullave” në Sofje prezanton 26 shfaqje nga e gjithë bota

Festivali Ndërkombëtar “Panairi i Kukullave” në Sofje do të prezantojë 26 shfaqje nga e gjithë bota, të cilat do ta njohin publikun me forma dhe gjuhë të ndryshme të teatrit bashkëkohor të kukullave dhe teatrit të rrugës. Veprimtaria do të zhvillohet nga 12 deri më 19 shtator, ndërsa mikpritës i edicionit të tij të 14-të do të jetë Teatri i Kukullave i Sofjes.

“Festivali do t’i shndërrojë hapësirat e ndryshme të Sofjes në skena për teatrin e kukullave, shfaqjet në rrugë dhe takimet mes artistëve dhe publikut nga Bullgaria dhe nga e gjithë bota”, deklarojnë organizatorët. Më shumë se 15 kompani teatrore do të prezantojnë shfaqjet e tyre në ambiente të mbyllura dhe në hapësira të hapura. “Panairi i Kukullave” nuk ka kufizime gjinore apo kufizime moshe dhe në program përfshihen veprimtari si për fëmijë, ashtu edhe për të rinj dhe të rritur – shfaqje teatrale, teatër rrugor, muzikantë rrugësh dhe të tjera.

Në kuadër të festivalit, Teatri i Kukullave i Sofjes do të shënojë 80-vjetorin e themelimit. Teatri do të prezantojë një seri të veçantë aktivitetesh kushtuar historisë dhe arritjeve të tij gjatë tetë dekadave të veprimtarisë krijuese.

Përpiloi: Diana Cankova

Përgatiti në shqip: Kostandina Bello