Mbi 55 000 fëmijë kalojnë pragun e shkollës për herë të pare

Mbi 55 000 nxënës të klasës së parë kalojnë sot pragun e shkollës për herë të parë. Me rënien e ziles së parë shkollore do të nisë viti i ri mësimor për më shumë se 700 000 nxënës në 2322 shkolla në të gjithë vendin, njofton Ministria e Arsimit dhe Shkencës e Bullgarisë.

Nga ministria vërehet një trend pozitiv i rritjes së numrit të të rinjve në sistemin arsimor gjatë viteve të fundit. Tashmë pothuajse çdo i pesti specialist pedagogjik në vend është nën moshën 35 vjeç.

Për vitin e ri shkollor janë ndërtuar më shumë se 2000 qendra të reja STEM në shkolla. Investimi prej mbi 250 milionë eurosh është realizuar në kuadër të Planit për Rimëkëmbje dhe Qëndrueshmëri.

Dita e parë e shkollës ka nisur tashmë edhe për mijëra fëmijë bullgarë jashtë vendit. Në 410 shkolla bullgare të së dielës, të vendosura në 44 shtete, viti i ri mësimor ka filluar për afro 40 000 nxënës.

 

Redaktoi: Miglena Ivanova

Përgatiti në shqip: Vesella Mançeva