Presim përqindje të madhe të fondeve nga PRQ-ja, humbjet – në masë të vogël

Presim që të marrim një përqindje të madhe të fondeve nga Plani për Rimëkëmbjen dhe Qëndrueshmërinë (PRQ). Këtë e deklaroi zëvendëskryeministri Atanas Pekanov gjatë dëgjimit të tij në Komisionin Parlamentar për Çështjet Evropiane dhe Kontrollin e Fondeve Evropiane. Sipas tij, humbjet do të jenë në një masë shumë të vogël.

Pekanov theksoi se deri më 30 shtator duhet të dorëzohet kërkesa për pagesën e pestë nga PRQ-ja, vlera e plotë e së cilës është 1.8 miliardë euro dhe përfshin 49 investime dhe 10 reforma. Sipas tij, gjatë muajve të fundit është arritur “përparim i jashtëzakonshëm” dhe në një masë të madhe janë përmbushur objektivat që lidhen me pagesën e pestë.

Ai vuri në dukje se nuk mund të thuhet paraprakisht se çfarë shume do të paguhet, pasi kjo varet nga vlerësimi i Komisionit Evropian. Sipas tij, ka elemente të disa reformave që nuk janë përmbushur dhe për to mund të mbahen fonde, por pritshmëria është të mos jenë në një masë të madhe, raportoi BTA.

Përpiloi: Miglena Ivanova

Përgatiti në shqip: Kostandina Bello