"Fusha me luledielli" e Ostava në versionin e ri të "hug or handshake"

Çfarë ndodh me një këngë kur, në vend që të tingëllojë në tonalitet minor, siç është regjistruar fillimisht, tingëllon në major? Këtë e dëgjojmë në fushatën bamirëse "Hite me 1% ndryshim" të organizatës "Një për qind ndryshim". Kënga e parë ishte "Arratisje" e duetit “Avenue”, por në një version të ri nga “Molec”. Titulli i dytë në këtë seri është "Fusha me luledielli" e grupit “Ostava”, e cila merr një interpretim të ri nga grupi “hug or handshake”.

Si ideja bamirëse, ashtu edhe mundësia për të ripërpunuar këtë këngë emblematike të vitit 1994, i fituan menjëherë muzikantët e rinj, siç rrëfen Anton Georgiev nga “hug or handshake”:

Që të merremi me muzikë, ne gjithsesi besojmë se ajo ka një aftësi të pashtershme për të ndihmuar dhe për të shëruar. Dhe unë e pashë këtë si një shtresë tjetër përmes së cilës mund ta bëjmë muzikën të ndihmojë. Përveç kësaj, mundësia për të realizuar një version të ri (cover) jo thjesht të njërit prej grupeve tona të preferuara bullgare, por të grupit tonë të preferuar bullgar, e bëri vendimin shumë të lehtë. Nuk kishim fare nevojë të mendoheshim.

Ndërsa punonin në versionin e ri të këngës, Antoni ndau shqetësimin e tij se kishin sjellë shumë më tepër se 1% ndryshim në tingullin e saj. Përgjigjja ishte se pikërisht kjo është ideja: fillon me 1%, por gjatë procesit të punës ai, si një ortek, shndërrohet në diçka shumë më të madhe.

Kjo përputhet me filozofinë e “Një për qind ndryshim”, e cila synon të inkurajojë njerëzit të dhurojnë 1% të të ardhurave të tyre për kauza që kanë nevojë për mbështetje. Dhe kur kjo bëhet një gjest i përhershëm për shumë njerëz, mund të çojë në një ndryshim të madh, siç pohon Irina Popova, pjesë e ekipit të “Një për qind ndryshim” dhe menaxhere e “Komunitetit dhe komunikimit”:

“Mesazhi i fushatës është se çelësi për të bërë mirë në mënyrë të qëndrueshme është dhurimi i rregullt. Dhe të jemi të bashkuar së bashku, të lidhur nga një kauzë e përbashkët, për të ndihmuar dhe për të sjellë ndryshim për mirë.”

Përgatiti në shqip: Vesella Mançeva