Në një kishë në Melnik u zbulua një afresk unik mesjetar

Për herë të parë, arkeologët zbuluan një skenë të plotë nga cikli i afreskeve mesjetare të kishës “Shën Hyjlindësja Burimjetuese”, në lagjen historike “Armenia” të qytetit të Melnikut, njofton Archaeologia Bulgarica. Zbulimi u bë pasi u hoq një shtresë afreskesh e periudhës së Rilindjes Kombëtare Bullgare, nën të cilën u shfaqën pikturat murale që datojnë nga shekulli i XIII-të ose fillimi i shekullit të XIV-të.

“Ky është fragmenti më i madh i afreskeve mesjetare të kishës që u zbulua deri më tani”, komentoi dr. Metodi Zllatkov. “Nuk kemi asnjë dyshim se bëhet fjalë për skenën “Lindja e Shën Mërisë”, pasi shihet qartë Maria me aureolë, e paraqitur si foshnjë”, shtoi Zllatkov. Cilësia e pikturës mesjetare është e një niveli të lartë artistik. Sipas të dhënave paraprake, autorët e afreskeve, me shumë gjasë, kanë ardhur nga zona e Serresit dhe Selanikut, theksoi arkeologu. 

Redaktoi: Ivo Ivanov

Përgatiti në shqip: Svetllana Dimitrova