Bullgaria do të vazhdojë të mbështetet te Polonia për avionët e saj MiG

Bullgaria do të vazhdojë të mbështetet te Polonia për mirëmbajtjen e avionëve luftarakë MiG-29 dhe po kërkon një partneritet më të ngushtë edhe për shfrytëzimin e F-16. Kjo u bë e qartë gjatë vizitës zyrtare të kryeministrit bullgar Rumen Radev në Poloni, pas takimit me homologun e tij polak Donald Tusk. “E vetmja mundësi për të mbajtur në funksion avionët MiG-29 është me ndihmën e Polonisë”, tha Radev. 

Ndër temat e diskutuara ishin gjithashtu energjetika, infrastruktura dhe siguria. Radev e cilësoi veçanërisht premtues bashkëpunimin mes dy vendeve në industrinë e mbrojtjes, teknologjitë e larta, sektorin e hapësirës dhe industritë e së ardhmes. 

Shkëmbimet tregtare mes Bullgarisë dhe Polonisë tashmë tejkalojnë 3 miliardë euro, ndërsa investimet polake në Bullgari janë mbi 650 milionë euro. Gjatë vitit 2025, afro 500 000 turistë polakë vizituan Bullgarinë, bëri të ditur kryeministri bullgar. 

Sipas Radevit, të dyja vendet mund të shkëmbejnë përvojë edhe lidhur me projektet në energjinë bërthamore që përdorin teknologjinë AP1000. Ai theksoi gjithashtu se një ekonomi e fortë ka nevojë për ndërlidhje, energji të besueshme, të sigurt dhe me kosto të përballueshme. Në këtë kontekst, ai vuri në dukje se të dy shtetet janë porta hyrëse për gazin natyror të lëngshëm amerikan në rajonin e Evropës Qendrore dhe Lindore: Polonia nga veriu dhe Bullgaria nga jugu, njofton BTA.

 

Redaktoi: Miglena Ivanova

Përgatiti në shqip: Vesella Mançeva