Mjekët bullgarë sërish me vizita falas për banorët e bashkisë së Pustecit

Filloi faza e dytë e vizitave mjekësore të specializuara parandaluese për të gjithë banorët e Bashkisë Pustec dhe zonës përreth. Më 25 dhe 26 shtator, specialistë bullgarë do të kryejnë vizita falas në fushën e mamologjisë, urologjisë, gastroenterologjisë, pulmonologjisë, otorinolaringologjisë dhe ortopedisë.

Nisma zhvillohet për të katërtin vit radhazi dhe organizohet nga Fondacioni “Kujtesa Bullgare”, Shoqata e Miqësisë Bullgaro-Shqiptare në Korçë, Ministria e Punëve të Jashtme e Republikës së Bullgarisë dhe Ministria bullgare e Mbrojtjes, në bashkëpunim me Ministrinë e Shëndetësisë dhe Mirëqenies Sociale dhe Bashkisë së Pustecit, - informon Ambasada e Bullgarisë në Tiranë në një njoftim për mediat.

Një risi e rëndësishme e fushatës së këtij viti është përfshirja e ekipeve shqiptare nga spitalet rajonale të Korçës dhe Pogradecit. Në fazën e dytë do të ketë pesë specialistë shqiptarë, të cilët do të punojnë së bashku me mjekët bullgarë dhe në rast nevoje do të marrin pjesë në ndjekjen e rasteve pas përfundimit të vizitave. Ky bashkëpunim krijon mundësi për vazhdimësinë e kujdesit mjekësor dhe monitorimin e pacientëve që kanë nevojë për ekzaminime ose trajtim të mëtejshëm.

Gjatë fazës së parë, të zhvilluar më herët këtë muaj nën drejtimin e kardiologut prof. Ivo Petrov, u kryen gjithsej 487 vizita të specializuara: 280 vizita kardiologjike dhe vaskulare, 100 endokrinologjike, 62 reumatologjike dhe 45 neurologjike. Numri prej 487 vizitash nuk përfaqëson numrin e pacientëve të veçantë, pasi disa persona kanë vizituar më shumë se një kabinet të specializuar. Gjatë fazës së parë nuk u konstatuan raste që kërkonin ndërhyrje të menjëhershme mjekësore urgjente. Për tre pacientë po shqyrtohet mundësia e trajtimit të mëtejshëm në Bullgari, pas kryerjes së vlerësimit të nevojshëm mjekësor dhe përcaktimit të kushteve organizative.

“Qëllimi ynë është që banorët e zonës të kenë qasje falas te specialistët, të përfitojnë nga parandalimi dhe diagnostikimi i hershëm dhe të marrin rekomandime për ndjekjen dhe trajtimin e mëtejshëm. Bashkëpunimi i drejtpërdrejtë me specialistët shqiptarë është një hap i rëndësishëm për të siguruar vazhdimësinë e kujdesit edhe pas përfundimit të iniciativës”, theksoi Sh.T. z. Ivaylo Kirov, Ambasador i Republikës së Bullgarisë në Republikën e Shqipërisë.

Në informacionin e mbërritur nga misioni ynë diplomatik në kryeqytetin shqiptar citohet edhe kryetari i Fondacionit “Kujtesa Bullgare”, dr. Milen Vrabevski, i cili gjatë hapjes së fazës së dytë të nismës deklaroi: “Për ne, misioni nuk përfundon me kryerjen e vizitës. Kur konstatohet një problem shëndetësor që kërkon diagnostikim ose trajtim të mëtejshëm, ne përpiqemi që pacienti të marrë kujdesin e nevojshëm mjekësor. Pikërisht kjo vazhdimësi e shndërron iniciativën nga një gjest i njëhershëm në një mbështetje reale dhe të qëndrueshme për njerëzit në Prespën e Vogël.”

Rajoni i Prespës së Vogël përfshin nëntë vendbanime me rreth 5000 banorë, të cilët marrin shërbime nga dy poliklinika – në fshatrat Pustec dhe Goricë. Në secilin prej dy institucioneve shëndetësore punon vetëm një mjek i përgjithshëm, ndërsa për vizita të specializuara dhe trajtim, banorët vendas, një pjesë e madhe e të cilëve janë të moshuar, duhet të udhëtojnë drejt kryeqytetit, Tiranës.

Gjatë viteve të fundit, Fondacioni “Kujtesa Bullgare” ka realizuar një sërë projektesh me ndikim konkret për banorët vendas. Ndër to janë dhurimi i një ambulance, i një automjeti zjarrfikës dhe i një automjeti fuoristradë për shërbimin e përkujdesjes sociale, pajisja e poliklinikës me aparatura profesionale mjekësore, si dhe sigurimi i një kontenieri mjekësor të pajisur për një nga fshatrat.Gjithashtu, pas riparimit të një ujësjellësi kryesor, është rikthyer furnizimi 24-orësh me ujë në një pjesë të vendbanimeve; është siguruar ndriçimi rrugor në katër fshatra; janë pajisur laboratorë kompjuterikë dhe biblioteka shkollore, si dhe janë mobiluar 44 vende pune në godinën e bashkisë – kujtojnë nga Fondacioni “Kujtesa Bullgare”.

Përpiloi: Elena Karkallanova

Përgatiti: Kostandina Bello