Margarita Hranova lë “Gjurmë” në thesarin e muzikës bashkëkohore bullgare

Margarita Hranova, e cila me zërin e saj të papërsëritshëm ka lënë gjurmë te breza të tërë adhuruesish të muzikës bullgare, prezanton këngën e saj të re “Gjurmë”. Edhe kësaj here muzika është e Biljana Angellovës, autore e disa prej këngëve më të buta dhe më prekëse të këngëtares. Margarita Hranova thotë:

“Kompozimet e Biljanës janë po aq melodike sa edhe të pazakonta nga pikëpamja muzikore. Unë e sfidoj vazhdimisht veten. Edhe kur më propozohet diçka që nuk është krejtësisht në stilin tim, përpiqem ta bëj timen dhe mendoj se ia dal.”

Biljana zakonisht i shkruan vetë tekstet e këngëve të saj, por në këtë rast vargjet janë të Aleksandër Pergellovit, ndërsa aranxhimin e ka realizuar Aleks Nushev. Ajo është autore e një sërë hitesh bashkëkohore për artistë të ndryshëm, por pranon se tandemi i saj krijues me Margarita Hranovën është më i dashuri:

“Margi ka qenë njeriu dhe zëri im i preferuar që nga vitet e shkollës, kur isha e mahnitur pas saj. Ajo është hajmalia ime; që kur u njoha me të, jeta ime mori drejtimin e duhur. Bashkëpunimi më i bukur, më i sinqertë, më i lumtur dhe më i thellë që kam pasur ndonjëherë është ai me Margin. Me të, rezultati gjithmonë i tejkalon pritshmëritë e mia dhe i afrohet asaj bukurie që e kam imagjinuar paraprakisht për secilën këngë.”

Shihni më shumë në arkivin e Radio Bullgarisë:

• "Bëhu dita ime" pikturon dashurinë e cila i kapërcen pengesat

Përgatiti në shqip: Vesella Mançeva