Filmi bullgar “Lust” u vlerësua në Festivalin e Filmit në Tiranë

Filmi artistik bullgar “Lust” i regjisores Ralica Petrova fitoi çmimin PerspecTIFF në edicionin e 24-t të Festivalit Ndërkombëtar të Filmit në Tiranë (Tirana International Film Festival), njoftoi Qendra Kombëtare e Filmit. Filmi mori pjesë në konkursin zyrtar të festivalit. 

Sipas motivacionit të jurisë, çmimi iu dha filmit “Lust” për vështrimin e tij depërtues dhe pa iluzione ndaj Bullgarisë bashkëkohore, që shkon përtej kufijve të dramës sociale dhe shndërrohet në një eksplorim thellësisht personal të tjetërsimit, dëshirës dhe trashëgimisë. 

Filmi është një bashkëprodhim mes Bullgarisë, Danimarkës dhe Suedisë. Vepra e Ralica Petrovës, e cila është edhe skenariste e filmit, rrëfen historinë e një psikologu në burg që përballet me të kaluarën e tij gjatë një udhëtimi të papritur pas vdekjes së babait të panjohur. 

Gjithsej pesë filma bullgarë morën pjesë në festivalin kinematografik, i cili u zhvillua nga 21 deri më 27 shtator në kryeqytetin shqiptar, Tiranë, kujton BTA.

 

Redaktoi: Ivo Ivanov

Përgatiti në shqip: Vesella Mançeva