“Unë jam njeri” nga Pllamen Bonev (De La Bona)

Në fund të një vere të mbushur me angazhime, Pllamen Bonev (De La Bona) prezanton këngën e tij të re, tërësisht autoriale, “Unë jam njeri”. Edhe pse publikohet tani, ideja për këngën, si në tekst ashtu edhe në muzikë, e ka shoqëruar prej kohësh këngëtarin e rokut, por vetëm së fundmi erdhi momenti për një aranzhim krejt të ri, realizuar nga Angell Djullgerov. Në “Unë jam njeri”, De La Bona ndërthur dy drejtimet e këngëve të tij – si anën më baladike, ashtu edhe tingullin më të fortë, siç shpjegon ai:

“Vetë melodia është sërish baladike, edhe mënyra e këndimit është baladike. Siç kam thënë, tendencat ndryshojnë – moda në muzikë ndryshon vazhdimisht. Ndryshojnë ritmet, tingujt, të gjitha llojet e plug-in-eve… Por e vetmja gjë që mbetet konstante është melodia. Aty nuk ka ndryshim: ose ta prek shpirtin, ose nuk ta prek.”

Në videon e “Unë jam njeri” është përdorur inteligjenca artificiale, gjë që, nga njëra anë, është në kontrast me titullin e këngës, por nga ana tjetër e thekson pikërisht mesazhin e saj me fjalët: “Supermen nuk mund të jem – unë jam thjesht njeri.”

“Faktori njerëzor nuk mund të zëvendësohet – shton Pllamen Bonev. – Unë dëgjoj shumë muzikë dhe gjithmonë mund ta dallosh kur është inteligjencë artificiale – kjo duket. Muzika është art; ajo duhet të përjetohet me gjithë shpirt, të jetohet dhe të ndjehet, dhe nuk duhet ta humbasim faktorin njerëzor në krijimin e saj.”

Përgatiti në shqip: Kostandina Bello