Incidentet në Detin e Zi mund të çojnë në rezervime të vonshme për verën e 2027

Nëse sulmet me dronë në Detin e Zi vazhdojnë, kjo mund t’i bëjë turistët e huaj t’i shtyjnë rezervimet e tyre për pushime në Bullgari gjatë verës së vitit 2027. Këtë e paralajmëroi Ivan Groshev, kryetar i Shoqatës së Agjencive Inbound (AIA), gjatë Forumit Ndërkombëtar për Hoteleri dhe Turizëm HTIF, i cili u mbajt nga data 12 deri më 14 tetor në Pallatin Kombëtar të Kulturës në Sofje.

Sipas tij, ekziston një mundësi e madhe që edhe sezoni i ardhshëm turistik veror të karakterizohet nga rezervimet e minutës së fundit.

“Nëse këto incidente në Detin e Zi vazhdojnë, sigurisht që periudha e rezervimeve do të zhvendoset më shumë drejt fillimit të verës”, parashikoi Groshev. Ai vuri në dukje se, deri më tani, ajo që po ndodh në Detin e Zi nuk po merr pasqyrim të gjerë në mediat perëndimore, por kjo nuk duhet ta qetësojë sektorin e turizmit. Sipas tij, ka shumë gjasa që edhe vitin e ardhshëm hotelierët të përballen me një sezon të karakterizuar nga rezervimet e minutës së fundit, gjë që do të kërkojë ndjekje të përditshme të shitjeve dhe një politikë fleksibile të çmimeve.

Groshev kujtoi se lufta në Iran dhe rritja e mëvonshme e çmimeve të karburanteve dhe energjisë kanë shkaktuar pasiguri te konsumatorët gjatë sezonit të kaluar veror. Kjo, nga ana tjetër, ka çuar në një shkurtim të ndjeshëm të periudhës ndërmjet rezervimit dhe mbërritjes së turistëve. Në shumë raste, pushimet janë rezervuar vetëm katër deri në gjashtë javë përpara. Kjo i ka detyruar disa hotele të ofrojnë zbritje më të mëdha për rezervimet e minutës së fundit.

Vencisllav Tançev, pronar i një kompleksi të madh hotelier pranë Pomories, gjithashtu parashikoi një sezon të vështirë në vitin 2027. Ai theksoi se rezervimet deri në këtë moment po ecin afërsisht me të njëjtin ritëm si vitin e kaluar, por ende është herët për parashikime përfundimtare. Sipas tij, pasiguria gjeopolitike dhe inflacioni po kufizojnë buxhetet që kanë në dispozicion turistët evropianë, ndërsa klientët që zgjedhin Bullgarinë janë veçanërisht të ndjeshëm ndaj çmimeve.

“Në një masë të madhe, në Evropë, në përgjithësi, ekziston shqetësim dhe një ndjenjë pasigurie te konsumatorët, si rezultat i situatës gjeopolitike, konflikteve të armatosura në disa vende të botës, si dhe inflacionit, nga i cili nuk është prekur vetëm Bullgaria”, tha Tançev. “Në të vërtetë, njerëzit kanë më pak para në dispozicion dhe klientët tanë potencialë preken nga kjo, ndoshta më shumë se të tjerët. Kjo ndodh sepse ne ende perceptohemi si një destinacion më ekonomik dhe klientët që vijnë në Bullgari janë më të ndjeshëm ndaj çmimeve. E kam të vështirë të jem optimist, për arsyen e thjeshtë se vitin e ardhshëm do të udhëtojnë më pak klientë drejt rajonit të Mesdheut dhe në përgjithësi drejt bregdetit tonë. Konkurrenca me destinacionet e tjera do të jetë edhe më e ashpër. Numri i shtretërve hotelierë rritet çdo vit, ndërsa kërkesa do të tkurret edhe më shumë.”

Vencisllav Tançev u bëri thirrje hotelierëve që të mos presin rezervimet e minutës së fundit, por të nxisin rezervimet e hershme që gjatë muajve të dimrit, përmes ofertave tërheqëse. Sipas tij, konkurrenca me Turqinë në segmentin e pushimeve të rezervuara pak para udhëtimit është “e dënuar të dështojë”, pasi vendi fqinj jugor disponon një kapacitet të jashtëzakonshëm akomodues dhe mund të ofrojë çmime me të cilat hotelet bullgare e kanë të vështirë të konkurrojnë.

Përgatiti në shqip: Sindi Nikollofski