Mimi Ivanova feston 80-vjetorin me një koncert

Një nga këngëtaret më të njohura bullgare të gjashtë dekadave të fundit, Mimi Ivanova, shënon 80-vjetorin e lindjes me një koncert jubilar me titullin “Kur isha vajzë – Mimi në moshën 80-vjeçare”. Më 28 tetor, në Sallën 1 të Pallatit Kombëtar të Kulturës (NDK) në Sofje, mbrëmja festive do të sjellë hite të pavdekshme, këngë të reja dhe takime të veçanta muzikore.

Krahas Mimi Ivanovës, në skenë do të ngjiten edhe artistë të dashur bullgarë, të cilët do të interpretojnë këngë nga repertori i këngëtares, si dhe nga krijimtaria e partnerit të saj të kahershëm dhe bashkëshortit, kompozitorit Razvigор Popov. Bashkëpunimi i tyre artistik daton që nga viti 1973.

E lindur më 28 dhjetor 1946, Mimi Ivanova këndon që në moshë shumë të vogël. Ajo i nisi hapat e parë në një shkollë muzikore në qytetin e saj të lindjes, Hisarja. Më vonë përfundoi Shkollën e Muzikës në Plovdiv dhe më pas degën e muzikës së lehtë në Akademinë e Muzikës në Sofje, në klasën e këngëtares së njohur Irina Çmihova.Që kur ishte studente, Mimi ishte soliste e orkestrës “Sofja”, ku kolegë të saj ishin Pasha Hristova, Marija Nejkova dhe Boris Guxhunov. Me këta artistë ajo regjistrtoi mëvonë këngë, të cilat fituan çmime prestigjioze, si “Orfeu i Artë”, “Pranvera” etj. Çmimet e saj në Bullgari dhe në Evropë, si dhe albumet e publikuara, janë të shumta, po aq sa edhe admiruesit e saj.

Bashkëpunimi mes Mimi Ivanovës dhe Radios Kombëtare Bullgare (BNR) nisi që në fillim të viteve 1970, kur ajo punoi intensivisht me Big Band-in e Radios, nën drejtimin e dirigjentit Vili Kazasjan, dhe vazhdoi ndër vite. Vetëm në konkursin “Pranvera” të BNR-së, këngët e interpretuara prej saj janë vlerësuar me çmime plot gjashtë herë.Ndër to është edhe kënga “Pesëmbëdhjetë tulipanë”, e vitit 1978, me muzikë dhe aranzhim nga Razvigor Popov dhe tekst nga Jordan Jankov. Kjo këngë është shndërruar në një nga krijimet më emblematike të karrierës së këngëtares.

Përpiloi: Diljana Traçeva