KULTURË

Artikull

Këndimi folklorik bullgar në programin e një festivali të specializuar në Gent

Mërkurë, 18 Nëntor 2026, 17:30

Këndimi folklorik bullgar në programin e një festivali të specializuar në Gent

FOTO: Facebook/ Voices on the Move

Madhësia e shkronjave

Edicioni i parë i festivalit Voices on the Move do të mbahet nga data 27 deri më 29 nëntor 2026 në qytetin e Gentit, në Belgjikë. Festivali i kushtohet zërit njerëzor dhe vendit që ai zë në muzikën tradicionale të popujve të botës – si mjet për të treguar histori, për të shprehur emocione dhe për të krijuar ndjenjën e përkatësisë në komunitet. Bullgaria është një nga pesë shtetet, trashëgimia vokale e të cilave do të prezantohet gjatë programit treditor të festivalit.

Ndër artistët virtuozë të stileve të ndryshme muzikore janë edhe dy përfaqësues të folklorit muzikor bullgar – prof. dr. Binka Koteterova-Dobreva dhe fizarmonicisti Aleksandër Rajçev.

Binka Dobreva dhe Aleksandër Rajçev

Binka Dobreva dhe Aleksandër Rajçev

FOTO: БНТ

Këngëtarja e muzikës popullore Binka Dobreva është një nga përfaqësueset më të shquara të artit të këngës nga rajoni folklorik i Trakisë në Bullgari. Ajo ka lënë zërin e saj në historinë e korit me famë botërore „Misteri i Zërave Bullgarë”, me të cilin është e lidhur që nga viti 1989. Ajo ka lindur në fshatin Roza, në rajonin e Jambollit, në një familje me tradita në muzikën popullore. Këngët e para i mësoi nga nëna e saj. Rruga e saj profesionale kaloi përmes Shkollës së Muzikës në Kotel dhe Akademisë së Arteve Muzikore dhe të Vallëzimit në Pllovdiv, pas së cilës u bë pjesë e ansamblit „Filip Kutev”. Me korin „Misteri i Zërave Bullgarë”, ajo ka dhënë koncerte në pesë kontinente dhe ka performuar në skena prestigjioze si „Carnegie Hall” dhe „Lincoln Center” në Nju Jork, „Kennedy Center” në Uashington dhe „Royal Festival Hall” në Londër. Binka Dobreva zhvillon gjithashtu një karrierë të suksesshme solo. Ajo publikon albume me këngë tradicionale trake dhe kompozime bashkëkohore autoriale, si dhe ua përcjell njohuritë e saj brezave të rinj në rolin e pedagoge muzikore. Që nga viti 2010, fshati i saj i lindjes, Roza, organizon një konkurs kombëtar të këndimit popullor, i cili mban emrin e saj.

Aleksandër Rajçev është muzikant, kompozitor, fizarmonicist dhe interpretues i gajdes bullgare, i cili kërkon mundësi të reja për prezantimin skenik të muzikës popullore, pa humbur lidhjen e saj me traditën. Ai është drejtues i orkestrës së tij folklorike dhe partner krijues prej shumë vitesh i këngëtares së muzikës popullore Binka Dobreva, me të cilën ka ndërtuar një karrierë të suksesshme të përbashkët muzikore. Rajçev ka kompozuar dhe aranzhuar këngët në gjashtë prej albumeve të saj, ndër të cilat „Tinguj modernë nga e kaluara”, „Me dashurinë nuk bëhet shaka”, „Për të pasurit dhe të varfrit” dhe „Lule nga Trakia”. Në punën e tij, ai ndërthur tingullin karakteristik të instrumenteve tradicionale bullgare me elemente të ndryshme muzikore bashkëkohore, duke i dhënë një jetë të re skenike folklorit të këngës trake.

Më 27 nëntor (e premte), në orën 19:30, të dy artistët do të marrin pjesë në aktivitetin muzikor kushtuar folklorit vokal – International Lange Zangtafel, i cili do të zhvillohet në Shtëpinë e Muzikantëve në Gent (Muzikantenhuis, Dampoortstraat 52, 9000 Gent).

Këndimi folklorik bullgar në programin e një festivali të specializuar në Gent

FOTO: Facebook/ Voices on the Move

Më 28 nëntor (e shtunë), në orën 19:00, muzikantët bullgarë do të marrin pjesë në koncertin Masters on the Move, në sallën e njohur të muzikës dhe teatrit (Trefpunt Concertzaal, Walter De Buckplein 5, 9000 Gent).

Programi përfshin gjithashtu dy punëtori praktike, më 28 dhe 29 nëntor, në të cilat në qendër të vëmendjes do të jenë folklori i këngës bullgare dhe traditat tona të Krishtlindjeve.

„Voices on the Move” synon të shndërrohet në një „Voices on the Move” në qytetin belg të Gentit.


Përgatiti në shqip: Sindi Nikollofski