Bullgaria do të ndërtojë një linjë të re hekurudhore me shpejtësi të lartë drejt Turqisë

Kompania Kombëtare "Infrastruktura Hekurudhore" po përgatit një lidhje të re hekurudhore të elektrifikuar deri te pika kufitare në Lesovo. Kjo do të përmirësojë lidhshmërinë dhe kapacitetin e trafikut midis Bullgarisë dhe Turqisë, njofton kompania. Studimi para-investues përfundoi. Projekti është pjesë e rrjetit trans-evropian TEN-T të BE-së.

Linja e re hekurudhore nga qyteti Jamboll deri në kufirin me Turqinë do të ketë një gjatësi prej 71 km me dy seksione kryesore – Jamboll – Ellhovo (39 km) dhe Ellhovo – Lesovo – kufiri (32 km). Seksioni i parë do të kalojë në pjesën më të madhe mbi trasenë ekzistuese, ndërsa i dyti do të jetë plotësisht i ri. Shpejtësia e projektuar është 160 km/h për trenat e udhëtarëve dhe 120 km/h për trenat e mallrave. Linja do të ketë 6 stacione ndalese dhe 3 stacione kryesore. Afati i pritshëm për ndërtimin është 6 vjet. Projekti ka rëndësi strategjike për Bullgarinë si një urë kyçe transporti midis BE-së dhe Turqisë, thuhet në njoftim.

Redaktoi: Ivo Ivanov

Përgatiti në shqip dhe publikoi: Svetllana Dimitrova

Foto: Kompania Kombëtare "Infrastruktura Hekurudhore" (NKZHI)