Një platformë e njohur italiane e udhëtimeve rekomandon ngrohtësisht Sofjen për në vjeshtë

Klima e butë, ngjarje kulturore dhe mundësi për të njohur traditat vendase – këto janë vetëm disa nga arsyet pse vjeshta është koha më e përshtatshme për të vizituar Sofjen, raporton portali i njohur italian i udhëtimeve siviaggia.it, i cili së fundmi i kushtoi një artikull të gjerë kryeqytetit bullgar.

Sofja, kryeqyteti i Bullgarisë, është ndër ato qytete që dinë të befasojnë pa bujë të tepërt. Ajo nuk është një destinacion tipik "kartoline", dhe pikërisht në këtë qëndron edhe magjia e saj, sepse bashkon stile të ndryshme arkitekturore, rrugë të ngarkuara me histori dhe një atmosferë të gjallë që balancon mes shpirtit të Evropës Qendrore dhe ndikimeve orientale.

Dhe stina në të cilën qyteti shpalos më plotësisht magjinë e tij është, pa dyshim, vjeshta. Nga shtatori deri në nëntor, drita bëhet më e butë dhe më e ngrohtë, parqet vishen me nuanca të arta, dhe moti i këndshëm të fton të endesh nëpër rrugicat dhe sheshet e qytetit, të ndalesh në ndonjë kafene retro dhe të vëzhgosh jetën që rrjedh më ngadalë – shkruan autorja e artikullit, Flavia Cantini. Ajo shton se një tjetër pjesë e magjisë së Sofjes, gjatë kësaj periudhe, qëndron në mungesën e zhurmës dhe rrëmujës tipike të kulmit të verës.

Në shtator, temperaturat ditore zakonisht lëvizin nga 17 deri në 25°C, dhe drita kristalore u jep fotografive një efekt pothuajse pikturor. Kjo është një mundësi e shkëlqyer për të kombinuar turizmin kulturor me arratisje të shkurtra në natyrë, duke përfituar nga afërsia me malin Vitosha – vetëm disa kilometra larg nga qendra e qytetit, rekomandon autorja e shkrimit.

Lexoni më shumë për malin Vitosha:

85 vjet Parku Vitosha – gjithnjë e më i dashur, gjithnjë e më tërheqës Një shëtitje për në Çerni Vrëh 120 vjet nga ngjitja e parë dimërore e majës Çerni Vrëh në Vitosha Pamje mahnitëse nga maja Çerni Vrëh Vitosha – mali i shpëtuar

Temperatura të këndshme dhe më shumë kohë për shëtitje

Vjeshta në Sofje ju fton të ngadalësoni ritmin. Deri në mesin e tetorit, moti është i butë, bulevardet e rrethuara me pemë, oborret e fshehura dhe kupolat e arta të kishave ortodokse, ofrojnë një kënaqësi të vërtetë estetike. Përveç kësaj, mund të vizitoni në qetësi muzetë, galeritë dhe monumentet historike, pa radhët dhe turmat e zakonshme.

Në fund të tetorit, ajri bëhet më i freskët dhe më i pastër, ndërsa mëngjeset shpesh mbulohen nga një mjegull e lehtë, që i jep qytetit një atmosferë romantike, pothuajse përrallore. Nëntori sjell të ftohtit e parë të vërtetë, dhe herë pas here edhe borën e parë, duke e kthyer Sofjen në një destinacion më intim dhe të ngrohtë.

Stina më e mirë për ngjarje kulturore dhe kulinarie

Vjeshta në Sofje nuk është vetëm kohë për shëtitje në natyrë – është edhe sezoni kur kryeqyteti bullgar zgjohet me një program të pasur ngjarjesh kulturore dhe gastronomike në nivel ndërkombëtar. Veçanërisht nëntori është një muaj i mbushur me tundime kulinarie dhe festa të dedikuara ushqimit dhe traditave. Ekspozita si Salloni i Verës bashkon prodhues verërash nga gjithë rajoni, duke ofruar degustime dhe takime me ekspertë. Paralelisht me të, "Rruga e Qumështit" prezanton produktet e bulmetit – krenaria e kuzhinës bullgare, ndërsa Interfood & Drink sjell tendencat më të fundit gastronomike përmes stendave tematike, kuzhinave demonstrative dhe punëtorive praktike.

Këto ngjarje janë një mundësi e shkëlqyer për të shijuar specialitete tradicionale bullgare, si banica – një byrek i kripur me petë të holla dhe djathë, ose taratori – një supë e ftohtë me kos dhe kastravecë, të shoqëruara me verëra vendase që ende rrallë gjenden jashtë Bullgarisë, rekomandon autorja e artikullit.

Vija e reajrore Torino – Sofje

Një arsye më shumë për udhëtarët italianë që të zgjedhin Sofjen pikërisht gjatë vjeshtës është edhe vija e re direkte ajrore e një kompanie të njohur ajrore me kosto të ulët nga Torino. Që nga data 28 tetor 2025, do të ketë tre fluturime në javë – të martave, të enjteve dhe të shtunave – duke ofruar një hyrje të re dhe të përshtatshme drejt një kryeqyteti që deri së fundmi kishte mbetur jashtë radarit turistik të shumë italianëve, raporton platforma italiane siviaggia.it https://siviaggia.it/idee-di-viaggio/sofia-bulgaria-autunno/549852/

Lexoni më shumë për kryeqytetin e Bullgarisë – Sofje nga arkivi ynë:

Sofja rekomandohet si destinacioni më i mirë evropian për turizmin pranveror Një qendër teknologjike kozmopolite dhe një nga qytetet më të gjallëruara evropiane – edhe Vogue vlerësoi hijeshitë e Sofjes Sofja në vitet '70 në fotografi unike arkivore Pa pritshmëri dhe informacion paraprak, por të kënaqur – rritje e numrit të turistëve në fundjavë në Sofje Harallampi Taçev – artisti që e dinte se si ta bënte Sofjen një kryeqytet të bukur Fotografi Ivan Shishiev: Koha është detaji më i vështirë për t'u paraqitur në një fotografi Në qendër të Sofjes bashkëjetojnë tempuj të feve të ndryshme Sofja – rrugë romake, mahnitje piktoreske dhe joshje kulturore Sofja – një qytet i lashtë me vendin e vet në historinë kulturore të Evropës Sofja – një qytet i lashtë dhe i ri Sofja – “rritet, por nuk plaket” Si dukej Sofja pas Çlirimit – një shëtitje e vogël Antonin Kolar – ndërtuesi i qytetit të Sofjes Sofja – një qytet plot histori Serdika antike një muze në të hapur “Die Welt” e përkufizon Sofjen si një alternativë ndaj Parisit dhe LondrësDaily Express për Sofjen: e bukur, e lirë, por e nënvlerësuar

Përpiloi: Veneta Nikollova

Përgatiti në shqip dhe publikoi: Svetllana Dimitrova

Foto: Facebook/ Етюд-и-те на София / Sketches of Sofia, food-exhibitions.bg