Kori legjendar “Misteri i zërave bullgarë” me koncert në Sofje

Më 27 gusht (e mërkurë), skena verore “Majmunarnika” në Parkun “Kopshti i Borisit” në Sofje do të ndriçohet nga magjia e folklorit bullgar. Kori i famshëm ndërkombëtarisht “Misteri i zërave bullgarë” do të mbajë një koncert të paharrueshëm nën yje.

“Misteri i zërave bullgarë” është një pasuri e vërtetë kombëtare dhe një ambasador i kulturës bullgare në botë. Me këndimin e tyre polifonik unik dhe harmoninë qiellore, ato kanë magjepsur publikun për dekada me radhë, duke fituar duartrokitje në skenat më prestigjioze botërore. Çdo interpretim i tyre është një udhëtim emocionues përmes kohës dhe traditave bullgare.

Kori u themelua në vitin 1952 me iniciativën e Georgi Bojaxhiev, kryeredaktor për shumë vite i redaksisë së muzikës popullore në Radion Kombëtare Bullgare (BNR). Njeriu që ua prezantoi botës interpretimet e ansamblit është studiuesi i muzikës Marcel Cellier – një instrumentist, etnomuzikolog dhe producent muzikor nga Zvicra.

Albumet e “Misterit të zërave bullgarë” janë nominuar disa herë për çmimin prestigjioz Grammy. Dhe në vitin 1990 kori e fitoi këtë çmim, për albumin: Le Mystère des Voix Bulgares. Volume Two.

Lexoni më shumë për korin në arkivin e Radio Bullgarisë:

"Një zogëz këndon" – Fillimi i MisteritLe të kujtojmë Marcel Cellier, i cili zbuloi "Misterin e Zërave Bullgarë"

Redaktoi: Miglena Ivanova

Përgatiti në shqip dhe publikoi: Svetllana Dimitrova

Foto: Facebook/The Mystery of the Bulgarian Voices