Kryeministri Rosen Zheljazkov kryeson delegacionin bullgar në forumin në Davos

Kryeministri Rosen Zheljazkov udhëheq delegacionin bullgar që merr pjesë në takimin vjetor të Forumit Ekonomik Botëror në Davos, Zvicër. Në përbërje të delegacionit merr pjesë edhe ministri i punëve të jashtme, Georg Georgiev, njoftoi Ministria e Jashtme е Bullgarisë. Në qendër të bisedimeve janë mjedisi ekonomik dhe gjeopolitik global, si dhe çështjet e sigurisë. Në këtë kontekst, ministri i jashtëm shpreh habi lidhur me një komunikatë për shtyp të shpërndarë nga kancelaria e kreut të shtetit, në të cilën njoftohet se presidenti Rumen Radev mori një ftesë nga presidenti i SHBA-së, Donald Trump, për t’u përfshirë në iniciativën e tij për paqe.

“Ftesa është e dërguar përmes rrugëve zyrtare të dielën dhe u mor të hënën, ndërsa tre ditë më vonë, në sfondin e informacionit tashmë të njohur për pjesëmarrjen e kryeministrit në forumin e Davosit, kreu i shtetit zgjedh të njoftojë marrjen e saj, pa shprehur qëndrimin e tij për përmbajtjen. Deri më tani nuk u shpreh asnjë qëndrim as për iniciativën për paqe në Gaza, as për planin 20-pikësh të paraqitur, si dhe për çështje të tjera kyçe të agjendës aktuale të politikës së jashtme”, deklaroi diplomati ynë i parë, cituar nga shërbimi për shtyp i Ministrisë së Punëve të Jashtme.

• Rumen Radev u ftua nga Trump në Këshillin për Paqe

Redaktoi: Miglena Ivanova

Përgatiti në shqip: Svetllana Dimitrova