Diplomatë bullgarë në Shkup dhe bullgarë vendas u përkulën para Goce Dellçevit

Diplomatë nga ambasada bullgare në Maqedoninë e Veriut, Qendra Kulturore‑Informative Bullgare në Shkup, bullgarë që jetojnë në Maqedoninë e Veriut dhe përfaqësues të komunitetit bullgar në vend nderuan 154‑vjetorin e lindjes së Goce Dellçevit duke vendosur kurora dhe lule mbi sarkofagun e tij në oborrin e kishës “Shën Spas” në Shkup, njofton BTA. 

“Edhe këtë vit jemi këtu për të shënuar një datë të ndritshme të historisë sonë të përbashkët dhe për të nderuar një nga revolucionarët tanë të mëdhenj – Goce Dellçevin. Dhe çdo herë që qëndroj para sarkofagut të Georgi Dellçevit, i bëj vetes pyetjen pse diçka që duhet të na bashkojë, na ndan kaq shumë. Dhe pse në një Maqedoni të Veriut moderne, të pavarur, potencialisht evropiane, fqinjën tonë, është kaq e vështirë të pranohet roli i popullit bullgar dhe i bullgarëve, si Dellçevi, pikërisht për këtë liri dhe pavarësi. Duke kujtuar fjalët e Dellçevit se e kuptonte botën ‘si një fushë për garë kulturore midis kombeve’, e kuptoj sa shumë do të ishte neveritur nga gjuha e urrejtjes së sotme, pavarësisht burimit të saj. Ai nuk do të pajtohej me këtë qasje. Nuk do ta pranonte, do ta dënonte, ashtu siç e dënojmë edhe ne”, tha ambasadori bullgar në Shkup, Zheljazko Radukov, para sarkofagut të heroit. 

Goce Dellçev lindi më 4 shkurt 1872 në Kukush. Falë përpjekjeve të tij, Organizata Revolucionare e Brendshme Maqedono‑Adrianopolitane (VMORO) tërhoqi në radhët e saj burra të guximshëm dhe zhvilloi veprimtari të gjerë në Maqedoni dhe në Trakinë e Adrianopojës. Goce Dellçev u vra në një përleshje në vitin 1903 pranë fshatit Banica.

 

Lexoni më shumë në arkivin tonë: 

Goce Dellçev përgatitet të festojë 154-vjetorin e lindjes së patronit të tij

 

 

Redaktoi: Ivo Ivanov

Përgatiti në shqip: Vesella Mançeva