Reagime për përbërjen e qeverisë teknike të propozuar nga Andrej Gjurov

Pasi kandidati për kryeministër teknik, Andrej Gjurov, paraqiti variantin e tij për përbërjen e kabinetit teknik, pasuan reagimet politike. 

• I mandatuari për formimin e qeverisë teknike prezantoi kabinetin

Sipas Kostadin Angellovit nga GERB-SDS, ideja e kabinetit është që disa formacione politike të sapolindura të favorizohen dhe të fitojnë zgjedhjet. 

“Nuk shoh figura të spikatura politike në kabinetin teknik të propozuar, por një përpjekje që çdo ministër të kuptojë nga puna e tij”, tha Nikollaj Denkov nga PP-DB. 

“Kjo qeveri teknike, që paraqet një amalgamë mes PP-DB, APS dhe aktivistëve të GERB-it, është një lloj Frankensteini shumë serioz politik. Nëse këtë e mendojnë si një miks për qeverisje pas zgjedhjeve, Zoti e ruajtë Bullgarinë”, komentoi lideri i “Vëzrazhdane”, Kostadin Kostadinov. 

Iskra Mihajllova nga “DPS – Fillim i Ri” deklaroi se kabineti teknik mund të quhet “Soros-Petrohan”. “Në përbërjen e kabinetit shohim njerëz të lidhur drejtpërdrejt me aferën ‘Petrohan’,” tha ajo. 

“Qeveria teknike e propozuar ka persona me angazhime të theksuara partiake dhe politike,” shkroi në Facebook Rumen Radev (president në periudhën 2017–2026). “Sgllobka(një term që përdoret për një koalicion të improvizuar prej partish politike të papajtueshme – shën. red.) e largoi institucionin e presidentit nga formimi i qeverisë teknike, dhe rezultatin e shohim sot – një kabinet teknik me figura qartësisht të angazhuara politikisht.” 

“Këto ndryshime të fundit kushtetuese e bëjnë të qartë se nuk është presidenti ai që mund të mbahet përgjegjës për këtë kabinet. Me ndryshimet në Kushtetutë u vendos që Kuvendi Popullor të funksionojë vazhdimisht pikërisht për të ushtruar kontroll mbi veprimtarinë e qeverisë teknike,” komentoi kryetari i BSP-së, Krum Zarkov.

 

Redaktoi: Miglena Ivanova

Përgatiti në shqip: Vesella Mançeva