Savina paraqet këngën prekëse “Qengji blegërin” me një aranzhim të ri

“Zablejalo mi agënce” (“Qengji blegërin”) është një nga këngët më emblematike të folklorit bullgar, e mbushur me shumë trishtim. Ajo rrëfen historinë prekëse të një qengji që bën zë me dhembje në vathën e bariut, sepse ndien paraprakisht ndarjen nga kopeja dhe nga nëna e vet. Si zbulues i këngës “Zablejalo mi agënce” konsiderohet këngëtari popullor Boris Mashallov, i cili e këndon që nga mesi i shekullit XX. Popullaritet të veçantë kënga fiton edhe në interpretimin e Nadka Karaxhovës. 

• “Qengji blegërin” – kënga që prek çdo zemër

Me kalimin e kohës jemi dëshmitarë të shumë interpretimeve të saj në variante të ndryshme nga këngëtarë pothuajse nga të gjitha zhanret muzikore. Ndër to është edhe versioni i modernizuar i këngëtares Savina, me aranzhim të Aleks Nushevit. Ai ndërthur një tingull etno modern me instrumente tradicionale si kavalli, i interpretuar nga Kostadin Gençev, në orkestrime për instrumente me tela. Savina shton: 

“Ndryshe nga tingulli klasik a cappella ose ai krejtësisht folklorik, aranzhimi i Aleks Nushevit mbështetet te një variant kinematografik. Përdorimi i orkestrës së harqeve dhe tingulli i thellë i kavallit krijojnë një ndjesi madhështie, duke ruajtur njëkohësisht intimitetin e historisë së kësaj kënge kaq të trishtuar popullore bullgare.”

Përgatiti në shqip: Vesella Mançeva