Ikona bashkon në lutje shën Serafim Sofijski Mrekullibërës dhe shën Joan Rillski

Më 26 shkurt shënojmë festën e njërit prej shenjtorëve më të dashur në historinë tonë bashkëkohore – shën Serafim Sofijski – Mrekullibërës. Për bullgarët, të cilët çdo ditë mblidhen te varri i tij, shën Serafimi është bariu shpirtëror, i cili me lutje ndërmjetëson para Zotit për ata që vuajnë. Para se të largohej nga kjo botë, ai e ngushëlloi kopenë e tij shpirtërore se do të vazhdonte të lutej për secilin që kërkon mbështetjen e tij dhe porositi që t’i shkruanin. Kështu, edhe pas vdekjes së tij ai vazhdoi të ndihmojë këdo që afrohet me besim dhe shpresë në Zotin, ndërsa besimtarët e quajnë me dashuri gjyshi Vlladika, sepse e ndiejnë të afërt me zemrat e tyre.

Rrjedha e pandërprerë e besimtarëve dhe dëshmitë për mrekulli të panumërta, të kryera me ndërmjetësimin e tij lutës, u japin arsye Kishës Ortodokse Ruse dhe Kishës Ortodokse Bullgare ta kanonizojnë si shenjt në shkurt të vitit 2016 dhe që atëherë çdo vit të dyja kishat e përkujtojnë solemnisht kujtimin e tij.

Me rastin e dhjetëvjetorit të kanonizimit të shenjtorit, në Kishën Ruse “Shën Nikollaj Mirlikijski” në Sofje u kremtua një Liturgji e Shenjtë festive, e kryesuar nga Patriarku Bullgar Daniill. Në fund të shërbesës, Shenjtëria e Tij mori si dhuratë një ikonë të pikturuar posaçërisht për të, e cila paraqet mbrojtësin qiellor të popullit bullgar shën Joan Rillski dhe shën Serafim Sofijski në lutje drejtuar Shpëtimtarit Jezu Krisht.

“Zoti është pikturuar lart dhe ata i drejtohen Atij në lutje – vëren ikonografja Ekaterina Titova, autore e ikonës. – Dy shenjtorët janë vendosur në sfondin e një miniaturë që paraqet qytetin e Sofjes, katedralen ‘Shën Aleksandër Nevski’, tempullin e lashtë ‘Shën Sofia’, Kishën Ruse ‘Shën Nikollaj’ dhe monumentin e Mbret Çlirimtarit. Në anën e shën Joan Rillskit, majtas, është Manastiri i Rillës, si edhe shpella në mal, ku ndodhet varri i shenjtorit. Në anën e shën Serafimit është paraqitur kisha në qytetin Shipka ‘Lindja e Krishtit’. Kur pikturova tempullin e Shipkës, kërkova në hollësi informacion për të, sepse ishte shumë e rëndësishme të paraqitej në mënyrë që të njihej. Kisha ndjesinë se isha pikërisht atje me ndihmën e Zotit.”

Ideja për pikturimin e ikonës nuk erdhi rastësisht, por falë një miqësie të vërtetë në Krishtin, të forcuar në një mendim dhe dashuri ndaj Zotit midis Ekaterina Totovës dhe teologes Vasilianna Merheb.

“Me afrimin e jubileut 10-vjeçar nga kanonizimi i shën Serafim Sofijskit Mrekullibërës dhe për shkak të lidhjes së mrekullueshme midis dy shenjtorëve, e përjetësuar edhe me shkrimin nga shën Serafimi i Akathistit të parë për lavdërimin e shën Joan Rillskit, tek ne lindi dëshira, nëse është vullneti i Zotit, që ikona t’i dhurohej patriarkut Daniil si kujtim nga kjo datë e paharrueshme – rrëfen Vasilianna Merheb. – Aq më tepër që pa dyshim patriarku ynë u lut dhe u zgjodh me ndërmjetësimin e dy shenjtorëve tanë. Përveç kësaj, patriarku Daniill nuk e fsheh mirënjohjen dhe nderimin e tij shpirtëror ndaj shën Joan Rillskit, gjë që dëshmohet edhe nga vizita e tij në Manastirin e Rillës, fjalë për fjalë disa orë pas zgjedhjes së tij si patriark.”

Për ikonografin, i cili afrohet me frikë ndaj Zotit në paraqitjen e shenjtorëve, pikturimi shoqërohet gjithmonë me kërkim të madh, tundime, dyshime dhe luftë të brendshme, vëren Katja Titova. Gjatë vizitës në Manastirin e Rillës në festën e shenjtorit të dashur bullgar, ajo mori të gjitha përgjigjet për kërkimet e saj shpirtërore në procesin e pikturimit të ikonës. Pas bekimit të atit të saj shpirtëror Vlladimir Tisçuk, drejtues i Kishës Ruse, Ekaterina iu përkushtua detyrës së përgjegjshme.

Kur mësuan për dhuratën që po përgatitej për Shenjtërinë e Tij, besimtarët nga famullia shumëkombëshe, të cilët vizitojnë rregullisht Kishën Ruse, mblodhën mjete financiare. “Ishte vërtet prekëse, deri në lot, me kontributet e vejushave dhe njerëzve të varfër, që ndanin nga mjetet e tyre modeste për dhuratën për patriarkun Daniill”, vëren Janina Alekseeva, e cila mblodhi donacionet.

Kur e mori dhuratën, patriarku Daniill nuk e fshehu gëzimin e tij dhe i falënderoi të gjithë për dhuratën e jashtëzakonshme, simbol i urës shpirtërore midis dy popujve ortodoksë.

Foto: Darina Grigorova, Vasilianna Merheb, Patriarkana Bullgare (https://bg-patriarshia.bg/)

Përgatiti në shqip: Sindi Nikollofski