Reagime politike pas rezultateve të zgjedhjeve parlamentare

Sot, 19 prill, në Bullgari u mbajtën zgjedhjet e parakohshme për Asamblenë e 52-të Kombëtare. Pas përfundimit të ditës së zgjedhjeve, pasuan reagimet nga forcat politike.

“Do të bëjmë gjithçka të mundur që të mos shkojmë sërish në zgjedhje.” Këtë e tha lideri i fitueses së zgjedhjeve “Bullgaria Progresive” dhe ish‑presidenti i Bullgarisë (2017–2026), Rumen Radev.

“Jemi gati për variante të ndryshme, vetëm që Bullgaria të ketë një qeveri të rregullt dhe stabile”, tha ai. Radev theksoi se Bullgaria do të mbetet në rrugën e saj evropiane, por me një qasje më pragmatike:

“Bullgaria vazhdon të ndjekë rrugën e saj evropiane, por Europa ka nevojë për mendim kritik dhe pragmatizëm.”

Sipas tij, fitorja e “Bullgarisë Progresive” është “një fitore simbolike e energjisë shoqërore kundër mosbesimit në politikë”. Radev falënderoi bullgarët jashtë vendit, të cilët pritën me orë të tëra në radhë për të ushtruar votën e tyre, si dhe anëtarët e komisioneve, shërbimet dhe organet e Ministrisë së Brendshme për përpjekjet në luftën kundër votës së blerë.

I pyetur për veprimet e ardhshme të "Bullgarisë Progresive" dhe reformën në drejtësi, Radev ishte kategorik se programi i tij parashikon hapa konkretë.

“Kemi një koncept të plotë, shumë të detajuar, për çmontimin e modelit oligarkik. Do ta ndjekim këtë rrugë,” tha ai.

"Pa koalicione, pa improvizime politike! Fitimi i zgjedhjeve është një gjë, qeverisja është një gjë krejt tjetër. Zgjedhjet vendosin se kush vjen i pari, por negociatat do të vendosin se kush do të qeverisë. Në politikë, si në jetë, nevojitet durim", komentoi GERB pas rezultateve të para në faqen e saj në Facebook. Gjatë votimit të tij sot, kreu i GERB, Bojko Borisov, deklaroi se GERB nuk do të merrte pjesë në koalicione dhe se shansi për një qeveri është i vogël. Ai kujtoi se gjatë viteve GERB ka marrë pjesë në koalicione të ndryshme, por ishte kategorik: "Nuk shoh me kë mund të formojmë një koalicion për momentin". Megjithatë, ai theksoi se partia do të ishte një opozitë konstruktive për çështje që lidhen me gjeopolitikën, siç është mbrojtja. Në këto zgjedhje, GERB shënoi rezultatin më të dobët.

"Është sportive të përgëzojmë fituesin e këtyre zgjedhjeve - z. Rumen Radev, dhe ne e përgëzojmë atë. Beteja për drejtësinë e votimit nuk ka mbaruar ende." Kjo u deklarua nga Asen Vasilev nga koalicioni PP-DB pas zgjedhjeve. Në një deklaratë, koalicioni njoftoi se PP-DB do të jetë garantuesi i rrugës evropiane të Bullgarisë në parlamentin e ri.

"Qytetarët bullgarë dolën, votuan dhe u larguan nga GERB dhe DPS në të kaluarën. Që nga tani e tutje, kemi një sasi të madhe pune përpara nesh", tha Vasilev.

"Falënderojmë secilin prej jush që zgjodhët të vetmen parti që mbron interesin kombëtar bullgar! Presim rezultatet përfundimtare!", shkroi “Vëzrazhdane” në Facebook. Gjatë votimit të tij sot, udhëheqësi i “Vëzrazhdane”, Kostadin Kostadinov, ishte kategorik se Bullgaria duhet të ndjekë një politikë më të pavarur, të ruajë monedhën e saj kombëtare dhe të ketë një kurs ekonomik të pavarur. Sipas fjalëve të tij, rinegocimi i marrëdhënieve të caktuara brenda BE-së është i nevojshëm.

"Duam të shprehim mirënjohjen tonë për të gjithë qytetarët bullgarë që ushtruan të drejtën e tyre për të votuar. Kjo tregoi se demokracia jonë është gjallë", tha Krum Zarkov, i cili drejtoi Partinë Socialiste Bullgare (BSP) në shkurt. Ai vuri në dukje se rezultatet ende nuk tregojnë përfundimisht nëse BSP do të përfaqësohet në parlament dhe se kjo do të sqarohet në orët dhe ditët në vijim. Zarkov përgëzoi partinë e Rumen Radev ("Bullgaria Progresive") për suksesin e arritur dhe theksoi se Bullgaria më në fund duhet të ketë një qeveri të qëndrueshme, kompetente dhe të ndershme. Sipas Zarkov, BSP është e gatshme të bashkëpunojë me formacione të tjera, "por me parime të qarta - transparencë, respekt të ndërsjellë dhe barazi".

• "Bullgaria Progresive" është fituesja në votimet parlamentare më 19 prill
• Zgjedhjet në Bullgari në mediat botërore

Redaktoi: Miglena Ivanova

Përgatiti në shqip: Vesella Mançeva