Kremtime festive parakaluan nëpër rrugët e qyteteve bullgare

“Le të ruajmë gjuhën bullgare, e cila na bën komb, na lidh, na bashkon dhe vulos vetëdijen tonë kombëtare”, deklaroi presidentja Ilijana Jotova gjatë një ceremonie përpara Bibliotekës Kombëtare “Shenjtor Kirill dhe Metodi”, me rastin e 24 Majit – Ditës së Vëllezërve të Shenjtë Kirill dhe Metodij, të Alfabetit Bullgar, Arsimit, Kulturës dhe Shkrimit Sllav.

Para kësaj, ajo mori pjesë në një marshim në qendër të Sofjes së bashku me kryetaren e parlamentit Mihaella Docova, patrikun bullgar dhe mitropolit të Sofjes Daniill, drejtorin e përgjithshëm të Radios Kombëtare Bullgare Milen Mitev dhe të tjerë.

“Sot rreth 300 milionë njerëz në botë shkruajnë me alfabetin tonë. E përdorin për të treguar ëndrrat e tyre, për të gjetur mirëkuptim mes tyre, për të shprehur dashurinë dhe për të transmetuar dijen më tej”, kujtoi kryetari i Bashkisë së Sofjes Vasill Terziev.

Përfaqësues të kopshteve për fëmijë, shkollave dhe universiteteve, si edhe të institucioneve kulturore e shkencore, morën pjesë në marshimin solemn në qytetin Varna, njoftoi korrespondentja jonë Daniella Stojnova.

Marshimi festiv nisi nën tingujt e himnit të arsimit bullgar “O ecë, o , popull i ringjallur”, të ekzekutuar nga Orkestra Frymore e Shkollës Kombëtare të Arteve “Dobri Hristov”, së bashku me grupin e mazhoranceve të së njëjtës shkollë.

Marshime festive u mbajtën edhe në Ruse, Stara Zagora dhe në shumë qytete të tjera të vendit.

• Ministrii Arsimit: Arsimimi formon personalitete të lira

Redaktoi: Miglena Ivanova

Përgatiti në shqip: Svetllana Dimitrova