Ministri i Ekonomisë: Bullgaria është e hapur për më shumë investime kineze

Bullgaria ka një vullnet të qartë politik për të zgjeruar bashkëpunimin ekonomik me Kinën dhe për të tërhequr më shumë investime kineze, deklaroi zëvendëskryeministri dhe ministri i ekonomisë, investimeve dhe industrisë, Aleksandër Pulev, gjatë hapjes së Tryezës së Rrumbullakët Kineze‑Bullgare për tregti dhe investime në Sofje.

Sipas tij, qeveria po përgatit një ligj për partneritetin publik‑privat, i cili do të sigurojë më shumë garanci për projektet strategjike të investimeve. Parashikohet gjithashtu krijimi i një njësie koordinuese pranë Këshillit të Ministrave për të lehtësuar investitorët duke reduktuar burokracinë.

Pulev theksoi se pas partneritetit strategjik midis Bullgarisë dhe Kinës, i arritur gjatë vizitës së presidentit Rumen Radev në Kinë në vitin 2019, vërehet një rritje e qëndrueshme e shkëmbimit tregtar. Ndër sektorët me potencial për bashkëpunim ai veçoi industrinë automobilistike, infrastrukturën, energjetikën, transportin, teknologjitë e informacionit dhe komunikimit dhe bujqësinë.

Më herët, Pulev zhvilloi një takim me 21 kompani kryesore kineze, gjatë të cilit ambasadori i Kinës në Bullgari, Shkëlqesia e Saj Dai Qingli, vuri në dukje përparimin në bashkëpunimin investues të Kinës në Bullgari në një sërë sektorësh.

 

Lexoni më shumë në arkivin e Radio Bullgarisë: 

• Bullgaria mund të luajë një rol të rëndësishëm në lidhjen Kinë-Evropë

 

Redaktoi: Miglena Ivanova

Përgatiti në shqip: Vesella Mançeva