Ministri i Jashtëm i Maqedonisë së Veriut është në Sofje

“Gjithmonë them se interesi i përbashkët i Bullgarisë dhe Maqedonisë së Veriut është të ecim përpara në rrugën drejt anëtarësimit të plotë në BE. Të dyja shtetet kanë shumë për të fituar nga kjo”, deklaroi Ministri i Jashtëm i Maqedonisë së Veriut, Timço Mucunski. Ai ndodhet në Sofje për takimin e Procesit të Bashkëpunimit të Evropës Juglindore, njofton BTA. 

“Dua të siguroj se kemi qëllimet më pozitive për të bashkëpunuar në fushën e mbrojtjes dhe sigurisë, të bashkëpunojmë në ekonomi, të bashkëpunojmë në arsim”, theksoi diplomati. 

“Besoj se të gjitha këto ngjarje të viteve të fundit i ndajnë artificialisht popujt e dy shteteve. Ajo që është e rëndësishme është të kemi një vështrim drejt së ardhmes, të mos fokusohemi te çështjet e së kaluarës – çështje të identitetit, historisë dhe gjuhës, sepse kemi një të ardhme që duhet të na bashkojë”, tha Mucunski. 

“Duhet të jemi të sinqertë, besimi në procesin e zgjerimit varet nga zbatimi. Meritat duhet të kenë rëndësi. Detyrimet duhet të respektohen. Ballkani Perëndimor ka nevojë për një rrugë evropiane të bazuar në rezultate, jo në shtyrje të vazhdueshme”, shtoi Mucunski, i cituar nga BGNES.

 

Redaktoi: Ivo Ivanov

Përgatiti në shqip: Vesella Mançeva