Shqipëria është mike dhe partnere e besueshme e Bullgarisë

Ministrja e Punëve të Jashtme, Velisllava Petrova, zhvilloi një takim dypalësh me homologun e saj shqiptar, Ferit Hoxha, në kuadër të takimit të ministrave të jashtëm të Procesit të Bashkëpunimit të Evropës Juglindore, që po mbahet sot në Sofje, njoftoi MPJ. 

Ministrja Petrova theksoi se Shqipëria është mike dhe partnere e besueshme e Bullgarisë në NATO dhe në rajon. Të dy u shprehën të një mendimi se qëllimi i përbashkët është që dialogu aktiv politik të shndërrohet në bashkëpunim edhe më të orientuar drejt rezultateve në fusha si lidhshmëria, energjetika, turizmi, ekonomia dhe arsimi. Çështja e pakicës kombëtare bullgare në Shqipëri ishte gjithashtu ndër temat e diskutuara. 

Në qendër të bisedës ishte edhe integrimi evropian i Shqipërisë. Sipas kryediplomates bullgare, Shqipëria mund të mbështetet te përkrahja e qëndrueshme e Bullgarisë për përfundimin sa më të shpejtë të procesit të anëtarësimit në BE.

Dy ministrat ndanë të njëjtin vlerësim për rëndësinë strategjike të Korridorit VIII, si dhe për rolin udhëheqës të Bullgarisë dhe Shqipërisë në përshpejtimin e realizimit të tij. Në kuadër të dialogut u diskutua edhe Konferenca Ndërkombëtare për Korridorin VIII, e cila do të mbahet në Sofje në tetor 2026.

Redaktoi: Miglena Ivanova

Përgatiti në shqip: Vesella Mançeva