Shoqatat bullgare në Maqedoninë e Veriut dënuan sulmin në Shkup

Pas djegies së dy automjeteve para ambasadës bullgare në Shkup, pasuan reagime nga shoqatat bullgare në Maqedoninë e Veriut, transmeton portali tribuna.mk. 

“Djegia e automjeteve para misionit diplomatik bullgar në Shkup është më shumë se një akt kriminal. Ajo është pasojë e drejtpërdrejtë e viteve të nxitjes së urrejtjes antibullgare, papërgjegjësisë politike dhe demonizimit sistematik të Bullgarisë dhe bullgarëve”, thuhet në reagimin e Ljupço Georgievskit, drejtues i klubit kulturor bullgar të ndaluar “Ivan Mihajllov” në Manastir. 

“Ndërsa zyrtarët shtetërorë flasin për vlera evropiane, në praktikë krijohet një atmosferë në të cilën sulme të tilla bëhen të mundshme. Kur urrejtja tolerohet, ajo kalon pashmangshëm nga fjalët në vepra. Ky rast ështënjë dëshmi e re për nevojën e presionit të vendosur ndërkombëtar dhe evropian ndaj një regjimi që gjithnjë e më shumë shfaq sjellje antievropiane dhe riprodhon praktika që Evropa duhej t’i kishte lënë pas. Presim zbulimin dhe ndëshkimin e menjëhershëm të autorëve. Çdo vonesë ose tentativë për minimizim do të kuptohet si inkurajim i heshtur i dhunës antibullgare. Sulmi është kundër shtetit bullgar, kundër vlerave evropiane dhe kundër të drejtës së bullgarëve në Maqedoninë e Veriut të jetojnë të lirë dhe me dinjitet. Mjaft. Evropa duhet të hapë sytë”, thuhet në reagimin e Georgievskit. 

“Le t’u besojmë institucioneve se do ta gjejnë fajtorin. Le të ruajmë gjakftohtësinë dhe arsyen. Të mos hedhim benzinë në zjarr. Shpresoj që kjo marrëzi të ndalet”, shkroi Dobre Mitrev, drejtues i shoqatës “Korridori Ballkanik” nga Kavadarci, në rrjetin social Facebook. 

Sulmi i fundit kundër Ambasadës Bullgare në Shkup është vazhdimësi e fjalëve të pafund të urrejtjes kundër Bullgarisë dhe bullgarëve. Zoti i bekoftë Bullgarinë dhe bullgarët kudo që janë, thuhet në reagimin e shoqatës “Valët e Perlave” nga Ohri. 

“Djegia e automjeteve para Ambasadës Bullgare në Shkup nuk duhet të konsiderohet incident i izoluar. Prej vitesh në Maqedoninë e Veriut krijohet atmosferë jotolerante ndaj njerëzve me identitet bullgar. Një pjesë e elitës politike preferon ta përdorë temën e Bullgarisë dhe bullgarëve për qëllime të brendshme politike, në vend që të punojë për reforma reale dhe zhvillim evropian. Sulmet ndaj klubeve kulturore bullgare, dhuna ndaj meje dhe qytetarëve të tjerë, presioni gjyqësor ndaj atyre që deklarojnë hapur identitetin e tyre bullgar, tregojnë një prirje shqetësuese. Edhe më shqetësuese është mungesa e reagimit të qartë dhe të menjëhershëm në shumë raste, gjë që krijon ndjenjë pandëshkueshmërie. Kur gjuha e urrejtjes tolerohet dhe autorët nuk marrin dënim të drejtë, fenomene të tilla vazhdojnë të përsëriten. Prandaj është koha që institucionet të tregojnë se ligji vlen për të gjithë dhe se të drejtat e çdo qytetari do të mbrohen, pavarësisht identitetit të tij kombëtar. Vlerat evropiane kërkojnë jo vetëm fjalë, por veprime reale kundër urrejtjes, dhunës dhe diskriminimit”, thuhet në deklaratën e Kristian Pendikov, ish‑sekretar i klubit të ndaluar “Mbreti Boris III” në Ohër.

Shoqata “DELO SKOPIE” (VEPRA E SHKUPIT) e dënon kategorikisht zjarrvënien e automjeteve diplomatike para ambasadës së Bullgarisë. “Kjo është zjarrvënie si kundër shtetit bullgar, ashtu edhe kundër bullgarëve në Maqedoninë e Veriut. Kur gjuha e urrejtjes është e përhapur në hapësirën mediatike dhe e mbështetur nga qeveria e VMRO‑DPMNE‑së, pasojat janë akte të tilla vandale dhe kriminale. Shpresojmë në reagim të shpejtë nga Ministria e Punëve të Jashtme të Bullgarisë”, thuhet në deklaratë. 

Shoqata “Shemeto” e dënon kategorikisht aktin vandal, i cili nuk premton asgjë të mirë për dy shtetet sovrane dhe të ndërlidhura, dhe apelon që rasti të sqarohet nga Ministria e Punëve të Brendshme dhe autori të mbahet përgjegjës.

 

Redaktoi: Ivo Ivanov

Përgatiti në shqip: Vesella Mançeva