Reagime pas deklaratës së kryeministrit për veton mbi sanksionet kundër Rusisë

“Mbrojtja e patriarkut Kirill nuk e bën Bullgarinë më të sigurt, më të pasur, më me ndikim, më konkurruese dhe nuk i forcon pozicionet tona në Bashkimin Evropian dhe sigurinë në rajonin e Detit të Zi.” Kjo thuhet në deklaratën e grupit parlamentar të GERB‑SDS me rastin e deklaratës së kryeministrit Rumen Radev se Bullgaria do të vendoste veto nëse nga propozimi i Komisionit Evropian për sanksione të reja kundër Rusisë nuk hiqet patriarku rus Kirill.

Sipas koalicionit, komenti i kryeministrit krijon përshtypjen se në një moment kur Evropa po përpiqet të kufizojë instrumentet e ndikimit rus, Bullgaria ka zgjedhur të mbrojë një prej mënyrave për këtë. Deputeti Daniell Mitov kujtoi fjalët e Rumen Radevit si president disa vite më parë, se Kirill kishte ardhur në vendin tonë si udhëheqës shpirtëror, por kishte zgjedhur të largohej si politikan.

“Deklarimi për veto mbi sanksionet kundër Rusisë është një gabim strategjik – Bullgaria nuk duhet të izolohet nga marrja e vendimeve në BE në një moment kaq të rëndësishëm strategjik, kur Evropa po lëviz me dy shpejtësi”, tha nënkryetari i grupit parlamentar të “Bullgarisë Demokratike”, Bozhidar Bozhanov.

Sipas deputetit, nuk mund të kthejmë në arsye për një veprim të tillë strategjik një agjent të shërbimeve ruse, i cili propagandon luftë, bekon armë automatike dhe dërgon të rinj rusë në front. “Po shohim se Bullgaria po shndërrohet në Hungarinë e Orbanit”, përfundoi ai.

“Është e drejtë të vendoset veto dhe patriarku rus ose kushdo tjetër të mos sanksionohet, por më e rëndësishmja është që qeveria të vendosë veto mbi të gjithë paketën e sanksioneve që prekin interesat ekonomike bullgare”, shprehu qëndrimin e “Vëzrazhdane” Conço Ganev.

Nënkryetari i Kuvendit theksoi se në kohët e vështira në të cilat jetojmë dhe luftojmë për mbijetesë financiare, është jashtëzakonisht e rëndësishme që sanksionet kundër Rusisë të hiqen.

DPS dhe partia në pushtet “Bullgaria Progresive” nuk komentuan qëndrimin e Rumen Radevit për veton.

Redaktoi: Diana Cankova

Përgatiti në shqip: Vesella Mançeva