Burgasi bëhet një pikë logjistike drejt relikteve të Shën Gjon Pagëzorit

Burgasi zyrtarisht bëhet pjesë e rrugës së re bullgare të pelegrinazhit “Rruga drejt relikteve të Shën Gjon Pagëzorit”, përmes një turi të vet këmbësor urban me titull “Beso në Burgas – nga historia deri te dyert e tempullit”.

Nisma është e shoqatës “Camino Bulgaria” dhe është e frymëzuar nga rrugët e njohura evropiane të pelegrinazhit, të cilat ndërthurin përvojën shpirtërore, trashëgiminë kulturore dhe turizmin e qëndrueshëm.

• Një itinerar pelegrinazhi do të lidhë Sozopolin dhe Mallko Tërnovon

Gjatë prezantimit të projektit, kryetari i Bashkisë së Burgasit, Dimitër Nikollov, theksoi se qyteti ynë në bregdetin jugor të Detit të Zi do të luajë një rol kyç si qendër logjistike e itinerarit – njofton BTA. Falë aeroportit ndërkombëtar, lidhjeve hekurudhore dhe atyre me autobus, Burgasi do të jetë një pikë hyrëse natyrore për pelegrinët dhe turistët nga Bullgaria dhe jashtë saj, të cilët dëshirojnë të nisen drejt Sozopolit dhe ishullit “Shën Ivan”, ku ruhen reliktet e Shën Gjon Pagëzorit.

Itinerari i ri urban është konceptuar si një udhëtim i veçantë nëpër historinë dhe larminë kulturore të Burgasit. Ai nis pranë Qendrës së Informacionit Turistik, afër stacionit hekurudhor dhe Autostacionit “Jug”. Prej andej, pelegrinët kalojnë nëpër disa nga monumentet më të rëndësishme kulturore dhe fetare të qytetit.

Si në rrugët e famshme evropiane, pjesëmarrësit do të kenë mundësinë të pajisen me një pasaportë të veçantë pelegrinazhi, e cila do të vërtetojë kalimin e tyre përgjatë itinerarit përmes vendosjes së vulave speciale në pika të caktuara të rrugës.

Projekti ka edhe një rëndësi më të gjerë për zhvillimin e rajonit. Turi urban dhe rruga e pelegrinazhit janë përfshirë në kandidaturën e përbashkët të Burgasit, Sozopolit, Primorskos dhe Carevos për Kryeqytetin Evropian të Kulturës.

 

• Qytetet bullgare nisin garën për Kryeqytetin Evropian të Kulturës 2032
• Veliko Tërnovo dhe Gabrovo kandidojnë së bashku për Kryeqytet Evropian të Kulturës 2032

 

Redaktoi: Elena Karkallnova

Përgatiti në shqip: Vesella Mançeva