Xhaz, natyrë dhe kauzë sërish nën yjet e Pllajës së Devetashkos

Për të 12-in vit radhazi, piktoreskja Pllaja e Devetashkos është skenë nën qiell të hapur për adhuruesit e muzikës improvizuese. Festivali “Xhaz nën yje” filloi të premten (26 qershor), ndërsa sipas traditës hapja iu besua grave nga shtëpia e kulturës në fshatin Gorsko Slivovo, të cilat prezantojnë këngë popullore nga repertori i tyre, të interpretuara në stilistikë xhazi. Përjetimin unik muzikor nën yje e plotësoi kuinteti “Portela dhe Terziev”. Në bërthamën e tij janë muzikantët e rinj Petër Terziev (vokal) dhe Alejandro Portela (klarinetë bas), të cilët u njohën në konservatorin e Barcelonës dhe tani sjellin talentin e tyre në skenën e pllajës.

• Fshati Kërpaçevo si qendra e Universit

Programi i së shtunës premton emocione të reja – ai fillon në orën 19:30, ndërsa hyrja për të gjitha aktivitetet është falas. Organizatorët i inkurajojnë vizitorët të vijnë me fëmijë dhe madje edhe me kafshët e tyre shtëpiake. Trompetisti Venci Bllagoev do të udhëheqë aktivitete speciale “xhaz për fëmijë”, që synojnë t’i njohin më të vegjlit me magjinë e improvizimit.

Në skenë do të ngjitet një duo emocionuese pianoje dhe buzuki. Formati jo tradicional është krijuar nga pianisti suedez, fitues i shumë çmimeve, Joel Lyssarides, dhe virtuozit grek të buzukit Georgios Prokopiou. Nën qiellin e hapur bullgar do të tingëllojnë për herë të parë kompozime nga albumi i tyre “Arcs” (2024), në të cilat xhazi bashkëkohor takon muzikën greke dhe tingullin modal, duke krijuar një projekt unik crossover, tregojnë organizatorët.

                                      Festival me kauzë dhe mikpritje

Sipas drejtoreshës së festivalit, Iva Taralezhkova, ngjarja tashmë është bërë “më e madhe” se idetë fillestare dhe është shndërruar në një festival me kauzë, i cili bashkon komunitetin dhe tërheq muzikantë nga vendi dhe jashtë tij. Të luash muzikë mes natyrës u jep artistëve hapësirë më të madhe për frymëzim.

Për vizitorët që duan të qëndrojnë gjatë gjithë fundjavës, mundësitë e akomodimit përfshijnë numrin gjithnjë në rritje të bujtinave lokale, si dhe vende të posaçme për çadra dhe autokampera.

• Mes ujëvarash dhe shpellash

Përpiloi: Elena Karkallanova

Përgatiti në shqip: Sindi Nikollofski