Sindikatat dhe biznesi kanë rezerva ndaj projektbuxhetit për vitin 2026

Këshilli Kombëtar për Bashkëpunim Trepalësh në Bullgari nuk arriti të dalë me një qëndrim të përbashkët për projektligjin e Buxhetit të Shtetit për vitin 2026. Këtë e bëri të ditur zëvendëskryeministri dhe ministër i financave, Gëllëb Donev, i cili prezantoi parametrat kryesorë të projektbuxhetit gjatë mbledhjes.

Sipas projektit, deficiti buxhetor parashikohet të jetë 5.7% e Prodhimit të Brendshëm Bruto (PBB) në vitin 2026; 3.8% e PBB-së në vitin 2027; 3.0% e PBB-së në vitin 2028.

Për të përmirësuar financat publike gjatë vitit 2026, qeveria propozon disa masa afatshkurtra për rritjen e të ardhurave në buxhet. Ndër to janë: rritja e tavanit maksimal të të ardhurave mbi të cilat paguhen kontributet e sigurimeve shoqërore në 2 300 euro, duke filluar nga 1 gushti 2026; rritja e pragjeve minimale të sigurimeve shoqërore për disa sektorë ekonomikë dhe profesione, mbi nivelin e pagës minimale; rritja e të ardhurave nga tarifat rrugore; përmirësimi i mbledhjes së kontributeve të sigurimeve shoqërore dhe i taksave; rritja e të ardhurave nga aktivitetet e lojërave të fatit, si dhe masa të tjera.

Shoqata e Kapitalit Industrial në Bullgari nuk e mbështet projektligjin në formën aktuale. Përfaqësuesi i saj, Rumen Radev, e cilësoi atë si një "buxhet të reformave të shtyra".

Dhoma Ekonomike Bullgare e mbështet projektbuxhetin, por me kushte, deklaroi përfaqësuesi i saj, Dobri Mitrev. Ndërkohë, Cvetan Simeonov, nga Dhoma e Tregtisë dhe Industrisë së Bullgarisë, tha se institucioni që ai përfaqëson e mbështet projektbuxhetin.

Konfederata e Sindikatave të Pavarura në Bullgari (KNSB) do ta mbështesë buxhetin vetëm nëse ruhet mekanizmi aktual për përcaktimin e pagës minimale dhe nëse shtyhet plani për uljen me 10% të shpenzimeve për personelin. Këtë e deklaroi presidenti i KNSB-së, Pllamen Dimitrov.

Nga ana tjetër, nënkryetari i Sindikatës "Podkrepa", Joanis Parteniotis, tha se organizata nuk mund ta mbështesë pa rezerva projektbuxhetin për muajt e mbetur të vitit, sipas njoftimit të Agjencisë Bullgare të Lajmeve BTA.

• Buxheti për vitin 2026 nuk përfshin politikat e kabinetit

Redaktoi: Ivo Ivanov

Përgatiti në shqip: Svetllana Dimitrova