Muzikantët e grupit D2 prezantojnë këngën e tyre më të re

Pothuajse një çerek shekulli pas këngës së njohur „Dy gjurmë përpara“, grupi D2 regjistroi një këngë të re me prezantuesin e njohur televiziv Dejan Sllavçev – Deo, me titull „Liri“. Sipas Dimitër Kërnevit, i cili është autor i muzikës dhe orkestrimit, si dhe bashkautor i tekstit së bashku me Aleksandër Obretenovin dhe Deo-n, ata nuk janë larguar kurrë vërtet nga njëri-tjetri. Ajo që i bashkoi sërish është miqësia dhe vera. Këngëtari kryesor i grupit, Diço Hristov, thotë: „Thjesht jemi plakur dhe jemi bërë më të mençur, përndryshe asgjë nuk ka ndryshuar.“

Ideja për këngën daton që nga vera e vitit 2014, kur Dimitër Kërnev po bënte një xhiro me biçikletë nëpër malin Rodopa. Emrin „Liri“ e propozoi basisti i D2, Aleksandër Obretenov.

Liria është një koncept veçanërisht i rëndësishëm për grupin, siç shprehet edhe Diço në një intervistë për Radion Kombëtare Bullgare (BNR):

„Fjala “Liri” është një nga fjalët më të fuqishme dhe më domethënëse në fjalorin tonë. Sot ndihemi më të lirë në muzikën që bëjmë dhe më të çliruar në mënyrën si mendojmë. Kemi kaluar një periudhë të gjatë, kemi fituar përvojë si muzikantë dhe si grup, dhe D2 i ka qëndruar kohës. Prandaj, sot kur bëjmë muzikë, ndihemi shumë më të lirë në atë që krijojmë.“

Dimitër Kërnevi e konfirmon këtë:

„Edhe për mua është njësoj. Sot jemi njerëz rreth të 50-ave, edhe pse çdo muzikant e përjeton ndryshe kalimin e viteve. Dhe jam i lumtur që edhe ne jemi ndër ata që e përballojnë mirë këtë fazë të jetës – thjesht jemi bërë më të qetë.“

Kënga „Liri“ do të interpretohet gjatë koncerteve të turneut kombëtar të D2, i cili nis më 15 gusht në Teatrin Veror të Burgasit dhe më pas vijon në Plovdiv, Stara Zagora, Varna dhe Sofje. Në tetor dhe nëntor, muzikantët do të nisen në një turne të madh evropian dhe mezi presin takimet emocionuese me komunitetet bullgare jashtë shtetit.

Ndërsa vitin e ardhshëm pritet të dalë edhe albumi i ri i grupit, i cili tashmë është pothuajse gati.

• Muzikantët e grupit D2 festojnë 25 vjet në skenë me një koncert

Përgatiti në shqip: Svetllana Dimitrova