Aleksandra Naçeva fitoi medaljen e bronztë në Kampionatin Evropian

Bullgarja Aleksandra Naçeva fitoi medaljen e bronztë në kërcimin trefish në ditën e katërt të Kampionatit Evropian të Atletikës, që u zhvillua në qytetin anglez të Birminghamit.

Medaljen e artë në këtë disiplinë e fitoi atletja ukrainase që garon për Italinë, Darja Derkaç, me një rezultat prej 14.60 metrash. E dyta u rendit belgja Salia Gis me 14.46 metra.

Naçeva, e cila do të mbushë 25 vjeç pas një jave, arriti rezultatin 14.40 metra në përpjekjen e saj të dytë, me erë të favorshme prej 3.4 m/s, duke siguruar kështu vendin e tretë.

Ky ishte i vetmi kërcim i vlefshëm i saj, pasi në përpjekjet e tjera ajo rrezikoi maksimalisht, por nuk arriti ta përmirësonte rezultatin.

Kështu, Aleksandra Naçeva fitoi medaljen e saj të parë në një garë të madhe në kategorinë e femrave, pasi në vitin 2018 u shpall kampione e Lojërave Olimpike Rinore në Buenos Aires dhe kampione bote për moshat nën 20 vjeç në Tampere.

Naçeva i solli Bullgarisë edhe medaljen e dytë në Kampionatin Evropian në Birmingham, pas medaljes së bronztë të Bozhidar Sarëbojukovit në kërcimin së gjati tek meshkujt, e fituar dy ditë më parë.

 

Redaktoi: Ivo Ivanov

Përgatiti në shqip: Vesella Mançeva