Aeroporti i Burgasit disponon infrastrukturën e nevojshme për “Eurovision” 2027

Aeroporti i Burgasit disponon infrastrukturën e nevojshme dhe kapacitetin operacional për të përballuar rritjen e pritshme të numrit të pasagjerëve gjatë “Eurovision” 2027. Kështu njoftuan për BTA nga “Fraport Twin Star Airport Management”, operatori i Aeroportit të Burgasit dhe Aeroportit të Varnës. 

Aeroporti i Burgasit mund të përpunojë deri në 21 lëvizje avionësh në orë dhe afërsisht 50 mijë pasagjerë në ditë, prandaj nuk është i nevojshëm zgjerimi i madh i infrastrukturës për shkak të konkursit. Megjithatë, ende nuk mund të parashikohet numri i fluturimeve shtesë të rregullta ose çarter. 

Në varësi të programit përfundimtar të fluturimeve, do të planifikohen personeli i nevojshëm, përdorimi i infrastrukturës së terminaleve, shërbimet tokësore, përpunimi i bagazheve dhe menaxhimi i fluksit të pasagjerëve. Operatori i aeroportit tashmë po zhvillon bisedime me një gamë të gjerë linjash ajrore dhe partnerësh për zhvillimin e rrjetit të linjave, tërheqjen e shërbimeve shtesë dhe rritjen e frekuencës së fluturimeve gjatë vitit 2027. 

Qyteti bregdetar do të jetë mikpritës i konkursit pasi këngëtarja bullgare Dara fitoi edicionin e këtij viti. Dy gjysmëfinalet do të zhvillohen më 11 dhe 13 maj, ndërsa finalja do të mbahet më 15 maj.

Lexoni më shumë:

• "Eurovision 2027" në Burgas do të sjellë shpirtin e papërsëritshëm bullgar
• "Evrovizion 2027” si provë për fytyrën e re të Bullgarisë

 

Redaktoi: Diana Cankova

Përgatiti në shqip: Vesella Mançeva