Bullgaria nisi numërimin mbrapsht për EuroVolley 2026

Bullgaria ka nisur numërimin mbrapsht për edicionin e 34-t të Kampionatit Evropian të Volejbollit për meshkuj, EuroVolley 2026, i cili do të zhvillohet nga 9 deri më 26 shtator.

Turneu do të mbledhë 24 ekipe kombëtare, ndërsa vendet organizatore janë Bullgaria, Italia, Finlanda dhe Rumania. Sofja do të presë ndeshjet e Grupit B, ku përveç Bullgarisë bëjnë pjesë edhe Polonia, Ukraina, Portugalia, Izraeli dhe Maqedonia e Veriut, si dhe një pjesë të takimeve të fazës eliminatore.

Sot, në sheshin “Shën Nedelja” në Sofje, u inaugurua një top i madh volejbolli me një orë të integruar, e cila do të numërojë kohën e mbetur deri në fillimin e kampionatit.

Ora u aktivizua nga kryetari i Bashkisë së Sofjes, Vasill Terziev, dhe presidenti i Federatës Bullgare të Volejbollit, Ljubomir Ganev. Në ceremoninë zyrtare morën pjesë gjithashtu kapiteni i kombëtares bullgare Aleks Grozdanov, trajneri Gianlorenzo Blengini dhe ndihmësi i tij Andrej Zhekov.

Ndeshja e parë e EuroVolley 2026 në Sofje do të luhet më 9 shtator në orën 19:00, kur Bullgaria do të përballet me Maqedoninë e Veriut në “Arena Sofia”.

Kombëtarja bullgare hyn në këtë garë si nënkampione e botës për vitin 2025.

 

Lexoni më shumë në arkivin e Radio Bullgarisë: 

Bullgaria u rikthye në hartën botërore të volejbollit – pas 55 vitesh është përsëri e argjendtë!

 

Redaktoi: Miglena Ivanova

Përgatiti në shqip: Vesella Mançeva