Një përqafim muzikor nga Mihaella Fileva në një moment të vështirë

Tashmë 15 vjet Mihaella Fileva vazhdon të ecë me guxim në rrugën e saj të pavarur muzikore. Kohët e fundit ajo nuk përfshin vetëm realizimin e këngëve, por edhe pjesëmarrjen në muzikale të ndryshme. Përveç kësaj, Mihaella Fileva ka një qëndrim të fortë mbi një sërë çështjesh – në këngën e saj më të re “Stuhi në një gotë ujë” ajo trajton problemin shumë aktual të ankthit dhe luftës me frikët tona të brendshme, të cilat vetë ajo i ka përjetuar vite më parë. Si autore e muzikës dhe tekstit, Mihaella hyn në studio me një ide të qartë edhe për aranzhimin, mbi të cilin punon së bashku me Angell Prodanov – Aço.

Si vetë kënga, ashtu edhe videoja e saj, përshkruajnë ndjesitë gjatë periudhave të vështira, të njohura për shumë prej nesh. Përveç titullit “Stuhi në një gotë ujë”, mesazhi i Mihaella Filevës gjendet edhe në frazën e refrenit “Edhe kjo do të kalojë”, të cilën këngëtarja, në momente sprovash, e përsërit shpesh si për veten, ashtu edhe për të afërmit e saj.

Ajo tregon se për një kohë është hezituar nëse kënga duhet të publikohet, pasi në të rrëfen një moment shumë personal:

“Kjo këngë ka funksionin e një përqafimi të ngrohtë për këdo që aktualisht po kalon nëpër ato momente të errëta. Muzika nuk ka funksionin e terapisë, por të një dore të shtrirë. Nuk e shkruaj këtë këngë për të treguar se çfarë kam kaluar unë dhe të kërkoj mbështetje – ajo me të vërtetë ka mbetur prej kohësh pas shpinës sime. Përkundrazi – dua që si person publik të them: ‘Hej, nuk je vetëm! Gjëra të tilla më ndodhin edhe mua, i ndodhin kujtdo – janë normale, nuk ka asgjë të frikshme, ka dritë në anën tjetër.’ U përpoqëm shumë që kënga të mbajë forcën që i duhet secilit për të kaluar momentet e vështira.”

"Stuhi në një gotë ujë” do të tingëllojë për herë të parë live, me një ndjesi edhe më epike, në koncertin e Mihaela Filevës më 5 prill në Sofje.

Shihni më shumë në arkivin e Radio Bullgarisë:

• Mihaella Fileva sjell hitet e saj pop në version simfonik
• "Kush është ajo?" - një këngë për gëzimin e të jetuarit me lehtësi
• Heroi i Dopaminës" - Mihaella Fileva u dhuron fansave të saj një hit veror
• “Loti i fundit” i këngëtares Mihaella Fileva

Përgatiti në shqip: Vesella Mançeva