Të përulemi para Kryqit dhe ta pranojmë me zemër flijimin e Zotit për ne

“Në këtë ditë, të përulemi para Kryqit dhe ta pranojmë me zemër flijimin që Zoti bëri për ne”, deklaroi para gazetarëve Patriarku Daniil, përpara se të shërbente rendin liturgjik të Orëve Mbretërore me nxjerrjen e Epitafit të Shenjtë në kishën mitropolitane “Sveta Nedelja” (“Shën e Diela”) në Sofje.

Patriarku kujtoi se e Premtja e Madhe është dita më e trishtueshme në krishterim: “Ne, njerëzit që çdo ditë mëkatojmë, në këtë ditë nuk u turpëruam të shpallim gjykim mbi Zotin, të dënojmë të Drejtin.”

“Flijimi i Krishtit është i madh dhe i pakapshëm për mendjen, ndërsa mënyra për ta pranuar atë është përmes mirënjohjes, kapërcimit të ligësisë, mosbesimit dhe urrejtjes, si dhe pastrimit të zemrave”, tha ai më tej dhe u bëri thirrje besimtarëve që sot t’i përkushtohen lutjes dhe falënderimit, duke lënë mënjanë shqetësimet dhe pasionet e jetës së përditshme dhe të përulen para Kryqit.

Lexoni më tepër:

• E Premtja e Madhe përkujton vuajtjet shëlbuese të Krishtit
• Të Premten e Madhe përjetojmë vuajtjet e Shpëtimtarit dhe mësojmë të falim
• Këngët e së Premtes së Madhe frymëzojnë besimin në Ringjallje

Redaktoi: Diana Cankova

Përgatiti në shqip: Vesella Mançeva