Të krishterët ortodoksë në Bullgari festojnë Ringjalljen e Krishtit

Patriarku bullgar dhe Mitropoliti i Sofjes, Daniil, kryesoi shërbesën për shpalljen e festës së Ringjalljes së Krishtit në katedralen patriarkale "Shën Aleksandër Nevski" në Sofje, ku u soll Zjarri i Shenjtë, i cili mbërriti nga Jerusalemi. Një kompani ajrore bullgare e transportoi Zjarrin e Shenjtë nga Bukureshti në Timishoara dhe, gjatë kthimit për në Sofje, e solli edhe në aeroportin "Vasill Levski", njoftoi Patriarkana Bullgare. 

Slliveni e priti festën me një liturgji solemne në të gjitha kishat e qytetit. Më e reja prej tyre – “Shën Petka” – u mbush me qindra banorë të qytetit, të cilët morën në shtëpitë e tyre nga Zjarri i Shenjtë me shpresë për paqe dhe mirëkuptim.

Në Bansko, të krishterë ortodoksë nga Bullgaria, Maqedonia e Veriut, Greqia dhe Serbia mbushën kishën “Shën Trinia” për të pritur së bashku festën. Në ditën e parë të Pashkës, burrat e Banskos mblidhen për lojën biblike “Lomada”, e cila është trashëguar nga paraardhësit e tyre që kanë vizituar Varri i Shenjtë, raportoi Keti Trençeva. 

Qindra besimtarë mbushën katër kishat ortodokse në Jamboll për të uruar njëri‑tjetrin për Ringjalljen e Krishtit. Të gjitha kishat dhe kapelat në ditën e festës në rrethin kishtar të Jambollit janë të hapura, por për shkak të mungesës së priftërinjve, jo kudo kremtohen liturgji festive, njofton korrespondentja jonë Daniella Kostova. 

Në katedralen mitropolitane “Shën Nikolla” në Vraca, shërbesa e Pashkës, e kryesuar nga peshkopi i Vracës, Grigori, mbledh gjithashtu një numër të madh besimtarësh. Leximi i Ungjillit të Ringjalljes do të bëhet në gjuhë të ndryshme, njofton korrespondentja jonë Iva Antonova. 

Në Veliko Tërnovo, në kështjellën “Caravec”, në mesnatë u uruan me “Krishti u Ngjall” bullgarë dhe shumë mysafirë nga Rumania. Rreth 3000 vezë të Pashkës dhe kozunakë (Buka e Pashkëve – shën. i red.) do t’u shpërndahen banorëve të qytetit pas shërbesës së Ringjalljes së Dytë, raporton Zdravka Masljankova.

Në Montana, Pashka shënohet me një valle festive dhe gëzim në sheshin “Zheravica” nga ora 10:30.

• Plovdivi e pret Pashkën me koncerte

 

Redaktoi: Miglena Ivanova

Përgatiti në shqip: Vesella Mançeva

Foto: BTA, BGNES, BNR