Radev: Falë sakrificës së martirëve të ndershëm, ne kemi një shtet

Bullgaria shënon 150 vjet që nga Kryengritja e Prillit. Ajo shpërtheu në vitin 1876 dhe është një nga ngjarjet më domethënëse dhe dramatike në historinë bullgare - kulmi i luftës çlirimtare kombëtare kundër Perandorisë Osmane. E shtypur me mizori, ajo tërhoqi vëmendjen e Evropës ndaj kauzës bullgare. 

“150 vjet na ndajnë nga heroizmi i mijëra bullgarëve që u ngritën kundër Perandorisë Osmane në emër të lirisë”, kujtoi në Facebook lideri i “Bullgarisë Progresive”, Rumen Radev, formacioni që sipas të dhënave paraprake kryeson në zgjedhjet parlamentare të djeshme. 

“Impulsi heroik i paraardhësve tanë të skllavëruar, të cilët nuk ishin patriotë për hir të pozitës dhe përfitimit, por heronj të guximshëm dhe vetëmohues, përfundon tragjikisht. Por ai e nxori Atdheun nga mosekzistenca dhe e solli fatin e tij në vëmendjen e popujve evropianë.  

Shtypja e tij dhe mijëra viktimat shkaktuan një valë empatie në botën e krishterë. Në Rusi, fati i popullit ortodoks bullgar u bë qendra e pasioneve politike. Falë bëmës dhe vetëmohimit të martirëve të ndershëm, sot kemi një shtet, një stemë dhe një flamur, flasim dhe shkruajmë në gjuhën tonë amtare. Le të mos harrojmë se gjaku i paraardhësve tanë ende rrjedh në venat tona. Le të jemi trashëgimtarë të denjë", shkroi Radev. 

• Letra e përgjakur” shpall fillimin e Kryengritjes së Prillit
• Kryengritja e Prillit – një kulm në luftërat çlirimtare të bullgarëve
• MakGahan dhe kauza bullgare

Redaktoi: Miglena Ivanova

Përgatiti në shqip: Vesella Mançeva