Filarmonia e Plevenit sjell hitet emblematike të muzikës pop bullgare

Këngë të dy prej kompozitorëve më të dashur bullgarë, Krasimir Gyullmezov dhe Svetosllav Lloboshki, do të interpretohen për herë të parë me shoqërimin e Filarmonisë së Plevenit. Më 17 qershor, koncerti me titull "Për ty isha frymë..." do të sjellë disa nga këngët më të njohura të dy kompozitorëve. Ideja për këtë projekt është e Çavdar Vëllkov, koncertmjetër i orkestrës.

Këngët "Për ty isha", e kompozuar nga Krasimir Gyullmezov dhe e interpretuar nga Lili Ivanova, si dhe "Frymë", e kompozuar nga Svetosllav Lloboshki dhe e interpretuar nga Orlin Goranov, i japin emrin dhe frymën këtij koncerti.

Përveç dy kompozitorëve, në skenë do të ngjiten edhe Dueti “Shik”, Grupi Instrumental “Klasikët” në përbërje Çavdar Vëllkov – violinë, Georgi Cvetkov – kitarë bas, Dimitër Mitev – instrumente goditëse, si dhe një sekstet harkor nga Filarmonia e Plevenit.

Aranzhimet e reja të këngëve të njohura, ku melodia shpesh kalon nga zëri i këngëtarit te violina, janë realizuar nga Georgi Cvetkov.

"Ideja e koncertit ishte që të jetë kryesisht instrumental, por Dueti “Shik” tashmë është pjesë e projektit. Edhe kompozitorët Gyullmezov dhe Lloboshki këndojnë vetë, sepse publiku dëshiron të dëgjojë tekstet e këngëve të njohura", thotë Çavdar Vëllkov.

Pas koncertit në Dollna Banja, turneu kombëtar "Për ty isha frymë..." i Filarmonisë së Plevenit do të vazhdojë me koncerte në qytetet Petriç më 1 shtator, Goce Dellçev më 2 shtator dhe në vendbanime të tjera të Bullgarisë.

Redaktoi: Diljana Traçeva

Përgatiti në shqip: Svetllana Dimitrova