U nderuan pedagogë nga Kosova për lektoratin e gjuhës bullgare

Ambasada bullgare në Kosovë dorëzoi mirënjohje në emër të Ministrit të Arsimit dhe Shkencës, prof. Georgi Vëllçev, si dhe në emër të Ambasadorit të Bullgarisë në Kosovë, Hristo Kraevski, për përfaqësues të shquar të komunitetit akademik të Universitetit të Prishtinës. Çmimet janë një shenjë vlerësimi të lartë për kontributin e tyre në hapjen e lektoratit të gjuhës bullgare në universitet, njofton Ambasada e Republikës së Bullgarisë në Prishtinë.

Gjatë ceremonisë u nderuan dekani i Fakultetit të Filologjisë, prof. dr. Abdulla Rexhepi, prof. dr. Mimoza Hasani‑Pllana,  drejtoresha e Qendrës së Gjuhëve, prof. dr. Lindita Sejdiu, si dhe drejtuesja e Departamentit të Ballkanistikës, prof. dr. Seniha Krasniqi.

Në kuadër të aktivitetit, dekani i Fakultetit të Filologjisë dhe prof. dr. Mimoza Hasani‑Pllana u nderuan gjithashtu me pllaketën “Karrocë Trake”, një kopje e një thesari trak, si shprehje mirënjohjeje për kontributin e tyre në këtë nismë të rëndësishme dhe për mbështetjen institucionale në realizimin dhe zhvillimin e saj të qëndrueshëm.

Një javë më herët, më 10 qershor, të njëjtat çmime iu ndanë edhe rektorit të Universitetit të Prishtinës, prof. Arben Hajrullahu.

Mësimi i gjuhës bullgare si gjuhë ballkanike filloi në vitin akademik 2025/2026. Ligjërues është Prof. Asoc. Dr. Raqi Bello.

Lektorati i gjuhës bullgare në Universitetin e Prishtinës përfaqëson një hap të rëndësishëm në zgjerimin e bashkëpunimit akademik dhe kulturor ndërmjet institucioneve të arsimit të lartë dhe institucioneve në rajon.

Ambasada e Republikës së Bullgarisë shpreh mirënjohjen e saj ndaj të gjithë partnerëve dhe pjesëmarrësve në këtë proces, i cili kontribuon në forcimin e marrëdhënieve dypalëshe dhe nxit shkëmbimin kulturor dhe arsimor.

Lexoni më shumë:

• BNR shpalli "Ambasadorët e rinj bullgarë të kulturës"

 

Redaktoi: Ivo Ivanov

Përgatiti në shqip: Vesella Mançeva

Foto: Ambasada e Republikës së Bullgarisë në Kosovë