Linja Edrene-Lesovo-Jamboll do të lidhë Bullgarinë me Turqinë e Rumaninë

E ardhmja e rajonit tonë do të përcaktohet gjithnjë e më shumë nga lidhshmëria midis Bullgarisë dhe Turqisë si një faktor për zhvillimin e Evropës Juglindore, duke krijuar mundësi të reja për shkëmbime mes Evropës dhe Azisë. Këtë e deklaroi kryeministri Rumen Radev gjatë një takimi në Sofje me ministrin turk të Transportit, Abdulkadir Uraloğlu, njoftoi shërbimi për shtyp i qeverisë.

Radev theksoi gjithashtu rëndësinë e linjës hekurudhore Edrene - Lesovo - Ellhovo - Jamboll, e cila do të ndërtohet si një trase alternative ndaj linjës hekurudhore që kalon përmes pikës kufitare shumë të ngarkuar “Kapitan Andreevo - Kapıkule”, njoftuan nga Këshilli i Ministrave.

Gjatë takimit u theksua se është e rëndësishme puna e përbashkët për korridoret e transmetimit të energjisë së gjelbër, si dhe për rrugët e tranzitit të gazit natyror drejt Evropës.

Rumen Radev theksoi gjithashtu se lidhja energjetike ndërkufitare midis Bullgarisë dhe Turqisë ka një rëndësi të jashtëzakonshme për rajonin. Kushtet e krijuara për përshtatjen e kontratës mes “Bulgargaz” dhe “BOTAŞ” me kushtet aktuale të tregut po çojnë tashmë në një ripërtëritje të interesit për furnizimin me gaz natyror nga fqinjët tanë përmes këtij korridori.

Ministri turk i Transportit, Abdulkadir Uraloğlu, deklaroi për BTA se në ndërtimin e ardhshëm të autostradës “Deti i Zi” midis Varnës dhe Burgasit do të marrin pjesë aktivisht si kompani dhe specialistë turq, ashtu edhe bullgarë.

Lexoni më shumë në arkivin e Radio Bullgarisë:

• Bullgaria dhe Turqia përshpejtojnë lidhshmërinë e transportit
• Bullgaria dhe Turqia do të bashkëpunojnë kundër krimit të "gjeneratës së re"

 

Redaktoi: Ivo Ivanov

Përgatiti në shqip: Vesella Mançeva