Vullnetarët zbuluan pranë Danubit gjetje me moshë deri në 65 milionë vjet

Gjatë inspektimit në terren të zhvilluar sot pranë lumit Danub, afër fshatit Rjahovo, vullnetarët zbuluan 22 gjetje që datojnë nga periudha bashkëkohore deri rreth 65-60 milionë vjet më parë. Aktiviteti u organizua nga Muzeu i Ruses, njoftoi institucioni në Facebook. Inspektimi u ndërmor në kushtet e nivelit të ulët të Danubit, i cili mundëson vëzhgimin e shtratit të lumit.

Ndër gjetjet më të rëndësishme janë fosilet e pjesshme të nofullave të poshtme të kuajve, fragmente kockash të demit të egër (aurokut) ose bizonit evropian, si dhe një grup fosilesh gocash deti me moshë rreth 65-60 milionë vjet.

Studimi në terren bashkoi energjinë e më shumë se 30 vullnetarëve, të cilët erdhën për të ndihmuar muzeun në kërkimin e artefakteve përgjatë brigjeve të Danubit.

Kujdestari i departamentit “Natyra” në Muzeun e Ruses, Krasimir Kirov, i cili ishte edhe drejtues i grupit, kujtoi për BTA se në fund të muajit të kaluar një banor i Rjahovos kishte zbuluar nofulla dhe kocka mamuthi. Mbetjet u transportuan më pas në Muzeun e Ruses.

• Niveli i ulët i Danubit zbuloi mbetje mamuthi pranë Rjahovos  
  
• Niveli i ulët i Danubit zbuloi themelet e Urës së Konstantinit

 

Redaktoi: Miglena Ivanova

Përgatiti në shqip: Vesella Mançeva