Borisov: Për GERB-in më të rëndësishme janë zgjedhjet e ardhshme lokale

GERB do të marrë një vendim deri më 8 shtator nëse do të propozojë kandidatin e vet për president apo do të mbështesë një kandidaturë tjetër. Këtë e deklaroi lideri i partisë, Bojko Borisov, gjatë një forumi rinor në Arbanasi, duke sqaruar se për partinë e tij më të rëndësishme janë zgjedhjet lokale të vitit 2027, raportoi korrespondentja jonë Zdravka Masljankova.

Vetë Borisovi është kundër pjesëmarrjes së GERB-it me një kandidat partiak në zgjedhjet presidenciale. Ai pranoi se në komunikimet e brendshme të partisë po zhvillohen diskutime intensive nëse GERB duhet të ketë apo jo kandidatin e vet.

Sipas Borisovit, zgjedhjet presidenciale ndryshojnë nga ato lokale, sepse në to zgjidhet figura që bashkon kombin dhe komandanti i përgjithshëm suprem i forcave të armatosura, një post veçanërisht i rëndësishëm në kushtet e luftërave dhe paqëndrueshmërisë ndërkombëtare.

Ai theksoi se, sipas vlerësimit të tij, ndër kandidatët e shpallur deri tani nuk ka ende një person që i plotëson plotësisht këto kritere.

 

Lexoni më tepër në arkivin e Radio Bullgarisë:

• Drejtori i BTA-së, kandidati i Ilijana Jotovës për nënpresident
• Andrej Gjurov dhe Georgi Kandev shpallën kandidaturat e tyre për Presidencën

 

Redaktoi: Miglena Ivanova

Përgatiti në shqip: Vesella Mançeva