Ansamblet muzikore të BNR-së do të marrin financim shtesë

Ministria e Financave dhe Radioja Kombëtare Bullgare (BNR) arritën një marrëveshje për financim shtesë të medias. Fondet janë të destinuara për rritjen e pagave të muzikantëve të ansambleve të Radios, e cila hyn në fuqi më 1 tetor 2026.

“Ky financim është hapi i parë drejt gjetjes së një zgjidhjeje të përhershme për një problem që zgjat prej dekadash dhe po përshkallëzohet”, komentoi drejtori i përgjithshëm i BNR-së, Milen Mitev. “BNR është institucion me buxhet të pavarur shtetëror, por Ministria e Kulturës po ndihmon aktivisht në kërkimin e zgjidhjeve funksionale. Falënderojmë për mirëkuptimin që morëm nga Ministria e Financave në këto kohë të vështira”, tha ai.

Vazhdon puna për gjetjen e një zgjidhjeje të qëndrueshme ligjore, e cila të përcaktojë me ligj statusin dhe veprimtarinë e ansambleve muzikore, duke garantuar kështu të ardhmen dhe financimin e tyre të përshtatshëm. “Së bashku me institucionet shtetërore po ecim drejt zgjidhjes së një problemi shumëvjeçar, i cili nuk duhet në asnjë mënyrë të cenojë jetën, shëndetin dhe dinjitetin e muzikantëve tanë”, përmblodhi drejtori i përgjithshëm i BNR-së.

Zgjidhja e përkohshme e çështjes erdhi pasi violinistja Iva Xhaxheva, soliste dhe anëtare e Orkestrës Simfonike të BNR-së, njoftoi se do të niste grevë urie nga 28 shtatori për shkak të protestave të vazhdueshme të muzikantëve të ansambleve të radios kundër pagave të ulëta.

Lexoni më tepër në arkivin tonë:

• Ministri premton se do të sigurohen fonde për orkestrat e BNR-së
• Violinistja e orkestrës së BNR-së shpall grevë urie për shkak të pagave të ulëta
  

Redaktoi: Ivo Ivanov

Përgatiti në shqip: Vesella Mançeva