Bullgaria forcon mbikëqyrjen në Detin e Zi

Bullgaria po forcon zbulimin dhe mbikëqyrjen në Detin e Zi, si edhe shkëmbimin e informacionit me aleatët e NATO-s për shkak të rreziqeve që burojnë nga lufta në Ukrainë dhe kërcënimeve hibride në rritje. Këtë e deklaroi Ministri i Mbrojtjes, Dimitër Stojanov, në një konferencë ndërkombëtare në Sofje me temën "Deti i Zi dhe Evropa Lindore: çelësi i sigurisë së Evropës", njoftoi Ministria e Mbrojtjes.

Në kontekstin e sulmeve me dron ndaj dy anijeve në zonën ekonomike të Bullgarisë në Detin e Zi, është rritur koordinimi ndërinstitucional dhe gatishmëria e Forcave të Armatosura për të reaguar ndaj incidenteve të reja. Janë vendosur gjithashtu masa shtesë për mbrojtjen e formacioneve ushtarake dhe objekteve të infrastrukturës kritike.

Sipas Stojanovit, siguria e Detit të Zi ka rëndësi strategjike për gjithë Evropën.

Lidhur me anijen e mbytur pas një sulmi me dron në Detin e Zi, Stojanovi tha se për momentin nuk janë planifikuar operacione të reja për inspektimin e saj. Bullgaria do t'i kërkojë NATO-s të ndihmojë në mbrojtjen e Detit të Zi me mjete radiolokacioni.

Lexoni më tepër në arkivin tonë:

• Sofja kërkon moratorium për sulmet ndaj anijeve tregtare në Detin e Zi
• Kryeministri e cilësoi të papranueshëm sulmin me dronë ndaj anijeve
• Dronë goditën dy anije mallrash 80 milje detare nga bregu bullgar

Redaktoi: Miglena Ivanova

Përgatiti në shqip: Vesella Mançeva