Dy trenat e parë “Alstom” në Bullgari pritet të nisin qarkullimin në shtator

Dy trenat e parë elektrikë “Alstom”, të dorëzuar në Bullgari në kuadër të Planit të Rimëkëmbjes dhe Qëndrueshmërisë, pritet të vihen në shërbim në fillim të shtatorit, njoftoi Ministri i Transportit Georgi Peev gjatë prezantimit të njësisë së parë elektrike hekurudhore të kompanisë në Stacionin Qendror të Sofjes. Presidenti i “Alstom” për rajonin e Evropës, Andrew DeLeone, theksoi se treni ka 6 vagonë, kapacitet për 325 pasagjerë, është plotësisht i pajisur me kondicionerë dhe i përshtatur për të funksionuar në temperatura deri në 35-40 gradë Celsius. Çdo pasagjer ka mundësi të karikojë pajisjet mobile, treni ka katër tualete dhe hapësirë për biçikleta, njofton BTA.

Dy trenat e parë pritet të vihen në qarkullim në linjën Pernik – Sofje – Plovdiv – Svilengrad. Arsyeja është se në këtë drejtim ka më shumë segmente hekurudhore që lejojnë lëvizje me shpejtësi deri në 160 km/orë.

Peev bëri të ditur se rreth 40 makinistë janë trajnuar tashmë për të operuar trenat e rinj.

Në Bullgari janë dorëzuar edhe 12 trena të tjerë, të cilët aktualisht ndodhen në proces certifikimi. Gjithashtu pritet dërgimi i 23 njësive të tjera hekurudhore.

Lexoni më shumë në arkivin tonë:

• Fillon rinovimi i trenave të Hekurudhave Bullgare
• 12 nga gjithsej 35 trenat e rinj elektrikë për Bullgarinë janë gati
• Trenat “Shkoda” i japin start modernizimit të hekurudhave bullgare

Redaktoi: Miglena Ivanova

Përgatiti në shqip: Vesella Mançeva