Mijëra njerëz u mblodhën në mbështetje të kabinetit

Protestuesit mbushën sheshet në një numër qytetesh, duke ngritur sloganin "Jo urrejtjes!" Tubimet u organizuan nga "DPS-Fillimi i Ri" - partia e Deljan Peevskit, e cila është partneri i katërt joformal i koalicionit trepartiak që formoi qeverinë aktuale. 

Demonstratat u zhvilluan në prag të një votimi mosbesimi kundër politikës ekonomike të kabinetit, për të cilën pritet të votojnë deputetët, dhe një mitingu të thirrur kundër qeverisjes së vendit nga koalicioni opozitar "Po e Vazhdojmë Ndryshimin - Bullgaria Demokratike". 

• Bullgaria pas protestave – buxheti u tërhoq, qytetarët këmbëngulin për vlerat
• Të rinjtë bullgarë tregojnë se janë gati të luftojnë për të drejtat e tyre

Sipas qendrës së shtypit të partisë “DPS-Fillimi i Ri”, demonstratat janë kundër tensionit politik të mbjellë nga opozita, provokimeve dhe përpjekjeve për të destabilizuar shtetin para futjes së euros dhe miratimit të buxhetit të shtetit. 

Më parë, Zëvendëspresidentja Ilijana Jotova e quajti ngjarjen një “kundërprotestë partiake” dhe deklaroi se duhet bërë gjithçka që është e mundur për të ruajtur paqen civile. Ajo e cilësoi si shqetësuese përdorimin e kartës etnike: “Për mua është jashtëzakonisht e pamatur të nxirren argumente të tilla sot, aq më tepër që ato nuk ekzistojnë.”

Në Kërxhali, ku tradicionalisht shumë njerëz votojnë për Lëvizjen për të Drejtat dhe Liritë (DPS), mijëra njerëz u mblodhën, raportoi Galina Kjuçukova nga BNR Kërxhali. Gjatë protestës u vunë re disa autobusë me qytetarë që mbërritën, megjithëse transporti i organizuar nuk ishte njoftuar zyrtarisht. Disa njerëz nuk ishin në dijeni të qëllimit të protestës, ndërsa disa të tjerë theksuan se ishin atje për të mbështetur mesazhet e unitetit.

“Protesta është në mbrojtje të stabilitetit në shtet, në mbështetje të qeverisë së Republikës së Bullgarisë”, thanë organizatorët nga foltorja në shesh. Në të morën pjesë udhëheqësi rajonal Rushen Fejzula, kryetarët e shtatë komunave dhe deputeti Elvan Gjurkash. Lideri i “DPS-Fillimi i Ri” Deljan Peevski nuk u shfaq në foltore.

• PP-DB paraqet mocion mosbesimi për politikën ekonomike të kabinetit

Më herët gjatë ditës, kryetari i bashkisë së Botevgradit, Ivan Gavaljugov, ndaloi një miting të "DPS-Fillimi i Ri" për shkak të valës në rritje të pakënaqësisë midis qytetarëve, qëllimit të tyre për të thirrur një kundërprotestë dhe supozimit të arsyeshëm se në këtë ngjarje do të merrnin pjesë mbështetës nga vendbanime të tjera, pasi qytetit i mungon një strukturë aktive partiake. 

“Bullgarët janë të indinjuar nga arroganca dhe mendjemadhësia, nga provokimet që oligarkët po organizojnë për të diskredituar protestën e njerëzve të lirë”, komentoi gjithashtu Presidenti Rumen Radev për ngjarjen. Ai shtoi se partia në pushtet ka shpikur një zhanër të ri – një protestë në mbështetje të qeverisë: “Në atë kohë, ne e quanim këtë manifestime, por ajo nuk mund ta fshehë të dukshmen – pakënaqësia është masive.”

• Dy protesta në dy ditë rresht këtë javë

Redaktoi: Diana Cankova

Përgatiti në shqip: Vesella Mançeva

Foto: BTA, BNR