“Sikur të ishe në Bullgari!” – shërbesë e Pashkës në bullgarisht në Dublin

Në shërbesën festive të Pashkës në Dublin, Irlandë, në gjuhën bullgare, Mitropoliti i Evropës Perëndimore dhe Qendrore, Antonij, shpalli Mesazhin Patriarkal dhe Sinodal për Ringjalljen e Krishtit para bullgarëve vendas që mbushën plot kapelën universitare “Të gjithë Shenjtët”.

Mes bashkatdhetarëve tanë që kishin ardhur posaçërisht për shërbesën ishte edhe Petër Donev, me origjinë nga Plovdivi, i cili prej 25 vitesh jeton në Irlandë. Për të, ashtu si për të gjithë bullgarët e mbledhur në tempull, liturgjia festive e udhëhequr nga Mitropoliti Antonij dhe e zhvilluar në gjuhën bullgare është një ëndërr e realizuar.

“Kjo është të ndihesh sikur je në Bullgari,” – ndau ai me ekipin e Radios Bullgaria dhe “Ura e besimit”.– “Këto janë festa në të cilat çdo i krishterë, pa marrë parasysh nëse është bullgar apo jo, gjen qetësi kur ka një liturgji si kjo sot. Njeriu vjen vetëm me veten e vet, mendon për atë pse jemi krijuar, çfarë duhet të jemi, çfarë bëjmë. Njeriu mbetet vetëm me mendimet e tij dhe kushdo që lutet – sipas mendimit tim – pa rëndësi nëse është i krishterë, mysliman apo çfarëdo tjetër, bën një llogari të jetës së vet: në të kaluarën, të tashmen dhe të ardhmen – çfarë do të bëjë, çfarë mendon të bëjë, çfarë mund të bëjë (sepse një gjë është të mendosh, tjetër është ta bësh).” Prandaj, në këtë festë, pa marrë parasysh ku je – në Irlandë apo në Bullgari – ti ndihesh më afër Zotit, vetëm me veten tënde, duke kërkuar paqe në shpirt dhe në familje.”

Kështu besimi bëhet ura që lidh njeriun me komunitetin.

“Ja, njerëzit mblidhen në tempull, pa rëndësi se çfarë pune bëjnë, sa vjeç janë… Kjo është bashkësia e të krishterëve, me përulësi para Zotit. Ne, të krishterët, jemi më të përulur. Dhe njerëzit në tempull afrohen me njëri‑tjetrin. Kjo është një mënyrë komunikimi që vjen nga e kaluara – në fshatra, në qytete, në lagje të ndryshme, njerëzit mblidheshin në një vend, komunikonin, dhe në thelb kjo është mënyra për të ruajtur traditat, për t’u parë dhe për të ndarë me njëri‑tjetrin,” – ndau Petër Donev para ekipit tonë.

Para njerëzve të grumbulluar, kuarteti “Svetogllas” dha tonin dhe i gjithë tempulli këndoi “I bukur je, o pylli im”.

Pas shërbesës, Mitropoliti Antonij mbolli një pemë në oborrin e ambasadës sonë në Dublin.

Lexoni më tepër në arkivin e Radio Bullgarisë:

• Shërbesa në bullgarisht mblodhi bullgarët në Irlandë
• Bashkatdhetarët tanë në Dublin e presin së bashku Pashkën
• Për Pashkë tek bashkatdhetarët në dioqezën e Evropës Perëndimore dhe Qendrore
• Ambasadorja Vanja Andreeva: Bullgarët në Irlandë janë njerëz të respektuar

Redaktoi: Miglena Ivanova

Përgatiti në shqip: Vesella Mançeva

Foto: Radio Bullgaria, Aleksandra Karamihaleva